وزیراعلیٰ پنجاب کے ویژن کے مطابق "رمضان نگہبان پیکیج” کی عزت و احترام کے ساتھ مستحقین تک رسائی یقینی بنانے کے لیے ڈپٹی کمشنر لاہور کیپٹن (ر) محمد علی اعجاز کی قیادت میں ضلعی انتظامیہ لاہور پوری طرح متحرک ہے اور فیلڈ میں غیر معمولی کارکردگی کا مظاہرہ کر رہی ہے۔ ڈی سی لاہور کی زیر نگرانی اس اہم مشن کی تکمیل کے لیے اسسٹنٹ کمشنرز، پی ایس ای آر، بینک آف پنجاب اور محکمہ ریونیو کا عملہ فیلڈ میں دن رات کوشاں ہے تاکہ ہر مستحق خاندان تک ان کا حق پہنچایا جا سکے۔ ضلعی انتظامیہ لاہور کی جانب سے کارکردگی پر کوئی سمجھوتہ نہ کرنے کی پالیسی کے تحت تحصیل سٹی میں فرائض میں غفلت برتنے والے 5 سرویئرز کو فوری طور پر برطرف کر دیا گیا ہے، جبکہ کام کی رفتار بڑھانے کے لیے واہگہ میں 50 اضافی اور کینٹ میں 167 سروے ٹیمیں فعال کر دی گئی ہیں جو گھر گھر جا کر تصدیق اور کارڈز کی ترسیل کا عمل مکمل کر رہی ہیں۔ لاہور کی تمام تحصیلوں میں ڈور ٹو ڈور مہم کے ساتھ ساتھ قائم شدہ کیمپوں میں بھی راشن کارڈز کی تقسیم کا عمل تیزی سے جاری ہے، جہاں ڈپٹی کمشنر کی خصوصی ہدایت پر بزرگ شہریوں اور خواتین کے لیے الگ کاؤنٹرز اور بیٹھنے کے بہترین انتظامات کیے گئے ہیں تاکہ کسی بھی شہری کو لمبی قطاروں میں نہ لگنا پڑے۔ دور دراز کے دیہی علاقوں اور بارڈر ایریاز میں سگنلز کے مسائل کے باوجود ٹیمیں اپنا روزانہ کا ہدف پورا کرنے کے لیے کوشاں ہیں، جس کی نگرانی خود اسسٹنٹ کمشنرز کر رہے ہیں۔ ڈپٹی کمشنر لاہور کیپٹن (ر) محمد علی اعجاز کا اس حوالے سے کہنا ہے کہ رمضان نگہبان پیکیج کی شفاف اور میرٹ پر مبنی تقسیم وزیراعلیٰ پنجاب کے عوامی فلاح کے مشن کا حصہ ہے، جس میں کسی بھی سطح پر کوتاہی برداشت نہیں کی جائے گی۔ انہوں نے واضح کیا کہ جہاں سروے ٹیموں کی حوصلہ افزائی کی جا رہی ہے وہیں ان کی کڑی نگرانی بھی جاری ہے تاکہ ہر حقدار کو اس کی دہلیز پر پیکیج کی فراہمی یقینی بنائی جا سکے۔
"رمضان نگہبان پیکیج” کی شفاف ترسیل کیلئے ڈی سی لاہور متحرک،ناقص کارکردگی پر تحصیل سٹی کے 5 سرویئرز برطرف، واہگہ اور کینٹ میں اضافی ٹیمیں فعال
