وزیراعلیٰ سندھ سید مراد علی شاہ نے 27 سالہ بصارت سے محروم سی ایس ایس کامیاب امیدوار ارل حسین سے وزیراعلیٰ ہاؤس میں ملاقات کی اور انہیں پاکستان کی فارن سروس میں شمولیت پر دلی مبارکباد پیش کی۔ ارل حسین نے سی ایس ایس کا امتحان 2024 کے بیچ میں کامیابی سے پاس کیا اور انہیں ان کی پہلی ترجیح فارن سروس کے لیے منتخب کیا گیا۔ اس موقع پر گفتگو کرتے ہوئے وزیراعلیٰ سندھ سید مراد علی شاہ نے کہا کہ ارل حسین کی کامیابی اس بات کا ثبوت ہے کہ عزم اور محنت کے سامنے کوئی جسمانی کمی رکاوٹ نہیں بن سکتی۔ وزیراعلیٰ سندھ نے نوجوان افسر کو گلے لگاتے ہوئے کہاکہ آپ نے ہم سب کا سر فخر سے بلند کر دیا ہے۔ ارل حسین نے اپنی تعلیمی جدوجہد بیان کرتے ہوئے بتایا کہ انہوں نے ابتدائی تعلیم خصوصی بچوں کے اسکول سے حاصل کی، بعد ازاں سینٹ پیٹرک ہائی اسکول اور جامعہ کراچی سے تعلیم مکمل کی۔ سید مراد علی شاہ نے سندھ حکومت کی پیپلز بس سروس کی بھی تعریف کی، جس کے بارے میں ارل حسین نے بتایا کہ وہ اسے باقاعدگی سے استعمال کرتے ہیں اور اسے نہایت مؤثر پاتے ہیں۔ انہوں نے وزیراعلیٰ سندھ سے گزارش کی کہ بس سروس میں ڈیجیٹل یا آواز سے معاون نظام متعارف کرایا جائے تاکہ بصارت سے محروم افراد آنے والی بسوں کو آسانی سے پہچان سکیں۔ ارل حسین نے مزید بتایا کہ سی ایس ایس امتحانات کے دوران بصارت سے محروم امیدواروں کو اضافی وقت دیا جاتا ہے، جس سے انہیں بہتر کارکردگی دکھانے میں مدد ملی۔ اس ملاقات میں وزیراعلیٰ کے پرنسپل سیکریٹری آغا واصف، سیکریٹری ڈپارٹمنٹ آف ایمپاورمینٹ آف پرسن وتھ ڈس ایبلٹیز (ڈی ای پی ڈی) طہٰ فاروقی، نیٹورک آف آرگنائیزیشن ورکنگ وتھ ڈس ایبلٹیز (NOWPDP) کے امین ہاشوانی، مصطفیٰ غازی اور اقرا نگی بھی موجود تھے۔ وزیراعلیٰ سید مراد علی شاہ نے سندھ بھر میں خصوصی افراد کی بڑھتی ہوئی کامیابیوں پر خوشی کا اظہار کیا۔ انہوں نے کہا کہ ہماری کاوشیں ثمر لا رہی ہیں۔ ہم خصوصی بچوں کے لیے اعلیٰ تعلیم اور بااختیاری کے مواقع فراہم کرنے کے لیے انکلوژو سٹی اور دیگر فلاحی تنظیموں کے ساتھ کام کرنا چاہتا ہوں۔ سید مراد علی شاہ نے کہا کہ سندھ حکومت ایک جامع معاشرے کی تعمیر کے لیے پرعزم ہے اور انہوں نے پاکستان بھر کی سول سوسائٹی اور نجی اداروں پر زور دیا کہ وہ خصوصی افراد کی ترقی اور انہیں بااختیار بنانے کے لیے ہاتھ بٹائیں۔
