وزیراعلی پنجاب مریم نوازشریف نے ڈپٹی کمشنرز کی پروموشن کارکردگی سے مشروط کرنے اور صوبے بھر میں روٹی اور بریڈ،کی مقررہ نرخ پر فروخت یقینی بنانے کی ہدایت کی ہے۔وزیر اعلیٰ پنجاب مریم نواز شریف کی زیرِ صدارت پرائس کنٹرول اور دیگر امور کا جائزہ لینے سے متعلق خصوصی اجلا س منعقدہ ہوا جس میں مانیٹرنگ کے اشاریوں سے ڈپٹی کمشنر زکی کارکردگی رپورٹ پیش کی گئی۔ وزیر اعلیٰ مریم نوازشریف نے اچھی پرفارمنس پر نارووال، ننکانہ صاحب، حافظ آباد اور مری کے ڈپٹی کمشنر ز کو شاباش دی۔ اجلاس میں نرخ کے استحکام، ڈویلپمنٹ سکیم، شادی کے کھانے میں ون ڈش کی پابندی، تعلیم اور صحت کے حوالے سے کارکردگی کا جائزہ لیا گیا۔ ڈپٹی کمشنرز کی پروموشن کارکردگی سے مشروط کرنے کا اصولی فیصلہ کیا گیا۔ وزیراعلی مریم نوازشریف نے مویشی منڈیوں میں قربانی کے جانور وں کی فروخت پر فیس عائد کرنے سے روک دیا۔ وزیر اعلیٰ مریم نوازشریف نے کہا کہ امید ہے ہر ڈی سی کام کرے گا، واضح فرق نظر آنا چاہیے۔روٹی کے نرخ مستحکم ہونے تک مانیٹرنگ کا عمل جاری رکھا جائے۔ روٹی کا سائز اور وزن کم ہونے کی شکایات نہیں ہونی چاہیے۔پرائس مقرر ہونے کے بعد عملدرآمد ڈپٹی کمشنر کی ذمہ داری ہے۔مریم نواز شریف نے کہا کہ ہسپتالوں میں مریضوں کے ویٹنگ ایریا میں شیڈ بنائے جائیں اورپنکھے بھی نصب کئے جائیں۔ ہسپتالوں میں مریضوں اور تیمارداروں کو صاف پانی کی فراہمی ہر صورت یقینی بنائی جائے۔ہسپتالوں میں مریضوں کے انتظار کا دورانیہ کم از کم ہوناچاہیے۔ بچوں پر حملے کرنے والے آوارہ کتوں کے ہٹانے کی مہم جاری رکھی جائے۔ شہریوں کی شکایت سے پہلے ہی صفائی ستھرائی ہوجانی چاہیے۔ وزیر اعلیٰ مریم نوازشریف نے کہا کہ پنجاب کے کسی شہر یا دیہات سے گندے پانی کے جوہڑ کی موجودگی کی شکایت نا قابل قبول ہے۔شہروں اور دیہات میں سیوریج،برینج اور دیگر مسائل حل کیے جائیں۔صفائی کے انتظامات اور سروسز پر کوئی سمجھوتہ نہیں ہوگا۔ڈپٹی کمشنر کا ہروزٹ عوام کے لئے بہتری کا باعث ہونا چاہیے۔انہوں نے کہا کہ ڈپٹی کمشنرزسپیشل ایجوکیشن سکولوں کا بھی ہفتہ وار وزٹ ضرور کریں۔سکولوں کی خستہ حال عمارتوں کے بارے قبل از وقت رپورٹ پیش کرکے مرمت یقینی بنائی جائے۔صوبے بھر میں سٹریٹ لائٹ اور فلٹرییشن پلانٹ کے بارے میں باقاعدہ مانیٹرنگ کی جائے۔وزیر اعلیٰ مریم نوازشریف نے کہا کہ ستھرا پنجاب کا مطلب ہر شہر اور ہر گاؤں کی صفائی ہے۔ لاہور کی صفائی اوردیگر صورت حال بہتر ہوئی ہے مزید بہتر بنائی جائے۔مصنوعی مہنگائی کا سدباب ہماری ذمہ داری ہے۔ڈپٹی کمشنرز اپنے اضلاع میں خسرہ کی صورتحال کی روزانہ کی بنیاد پر مانیٹرنگ کریں۔فیلڈ ہسپتال اور کلینک آن ویل پروگرام کی مانیٹرگ کا عمل جاری رکھا جائے۔خسرہ سے بچاؤ کے لئے جنگی بنیادوں پر ویکسی نیشن کی جائے۔مویشی کی آمد پر گانگو وائرس کے پیش گی سد باب کے لئے اقدامات کئے جائیں۔ہر شہر میں مقررہ مقام پر ہی مویشی منڈی لگانے کی اجازت دی جائے۔عید پر قربانی کے بعد چند گھنٹوں میں شہر صاف ہونا چا ہیے۔ سینیٹر پرویز رشید، وزیر اطلاعات عظمیٰ زاہدبخاری،معاون خصوصی ذیشان ملک، ایم پی اے ثانیہ عاشق، چیف سیکرٹری زاہد اختر،پرنسپل سیکرٹری وزیراعلی ساجد ظفر ڈال، کمشنر لاہور اور دیگر متعلقہ حکام نے شرکت کی جبکہ کمشنرز اور ڈپٹی کمشنرز ویڈیو لنک کے ذریعے شریک ہوئے۔
ڈپٹی کمشنرز کی ترقی کارکردگی سے مشروط کرنے کا اصولی فیصلہ،وزیر اعلٰی مریم نواز شریف کی زیرصدارت خصوصی اجلاس
