خیبر پختونخوا کے وزیر برائے پبلک ہیلتھ انجینئرنگ حاجی فضل شکور خان نے ضلع ایبٹ آباد کا دورہ کیا، جہاں انہوں نے کوریا اور جاپان کے تعاون سے جاری و مکمل شدہ میگا پینے کے صاف پانی کے منصوبوں کا معائنہ کیا۔ اس موقع پر ایم پی اے افتخار احمد جدون اور ایم این اے علی اصغر بھی ان کے ہمراہ موجود تھے۔دورے کے دوران حکام نے زیر تعمیر کورین تعاون سے جاری منصوبے پر بریفنگ دی، جس پر 4 ارب 64 کروڑ روپے لاگت آئے گی اور یہ اگست 2026 تک مکمل ہوگا، جبکہ جاپان کی مالی معاونت سے جائیکا (JICA) کے تعاون سے مکمل ہونے والی گریوٹی فلو واٹر سپلائی سکیم 2014 سے فعال ہے اور یومیہ 38 لاکھ گیلن صاف پانی فراہم کر رہی ہے۔وزیر پبلک ہیلتھ انجینئرنگ نے منصوبوں کی پیش رفت اور کارکردگی پر اطمینان کا اظہار کرتے ہوئے کہا کہ عوام کو صاف اور معیاری پینے کے پانی کی فراہمی صوبائی حکومت کی اولین ترجیح ہے، اور یہ میگا منصوبے ایبٹ آباد اور حویلیاں کے لاکھوں شہریوں کے لیے عوامی صحت اور پائیدار ترقی کی جانب ایک اہم سنگِ میل ثابت ہو رہے ہیں۔
