چین کے شہر شنگھائی میں چین کی مشہور یوٹونگ بس کمپنی کے حکام نے سندھ کے سینئر وزیر شرجیل انعام میمن اور صوبائی وزیر برائے توانائی، ترقی و منصوبہ بندی سید ناصر حسین شاہ کی ملاقات کی۔ ملاقات میں سندھ میں ٹرانسپورٹ اور توانائی کے شعبوں میں سرمایہ کاری کے مواقع پر تفصیلی تبادلہ خیال کیا گیا۔ ملاقات میں دونوں فریقوں نے ٹرانسپورٹ اور متبادل توانائی کے شعبوں میں تعاون کو مزید فروغ دینے پر اتفاق کیا۔
ملاقات کے موقع پر یوٹونگ حکام نے وزراء کو اپنی نئی اور جدید ماڈل بسوں کے بارے میں بریفنگ دی اور پاکستان، بالخصوص سندھ میں اپنی بسیں متعارف کرانے میں دلچسپی کا اظہار کیا۔اس موقع پر سندھ کے سینئر وزیر اور صوبائی وزیر برائے اطلاعات، ٹرانسپورٹ و ماس ٹرانزٹ شرجیل انعام میمن نے کہا کہ سندھ حکومت شہریوں کو معیاری اور محفوظ ٹرانسپورٹ فراہم کرنے کے لیے پرعزم ہے۔دھابیجی اسپشل اکنامک زون کو غیر ملکی سرمایہ کاروں کے لیے بڑا موقع ہے، اور سرمایہ کاروں کو دھابجی اسپیشل اکنامک زون میں دس سالہ ٹیکس چھوٹ دی جارہی ہے اور ساتھ ساتھ حکومت سندھ اس زون میں بین الاقوامی سرمایہ کاروں کو تمام ممکنہ سہولتیں فراہم کر رہی ہے۔سینئر وزیر شرجیل انعام میمن نے کہا کہ سندھ میں ٹرانسپورٹ کے شعبے میں بڑے پیمانے پر اصلاحات کی ضرورت ہے اور کراچی سمیت صوبے کے دیگر شہروں میں عوام کو معیاری بس سروس فراہم کرنا حکومت کی اولین ترجیح ہے۔ ان کا کہنا تھا کہ سندھ حکومت چاہتی ہے کہ یوٹونگ جیسے بین الاقوامی ادارے پاکستان آ کر جدید بسیں تیار کریں تاکہ مقامی مارکیٹ کی ضروریات پوری کی جا سکیں۔اس موقع پر صوبائی وزیر برائے توانائی، منصوبہ بندی و ترقی سید ناصر حسین شاہ نے کہا کہ سندھ حکومت ماحول دوست اور توانائی کے متبادل ذرائع پر مبنی پبلک ٹرانسپورٹ متعارف کرانے کی خواہش رکھتی ہے۔ ان نے کہا کہ یوٹونگ کی بسیں ماحول دوست خصوصیات اور توانائی کے متبادل ذرائع کے حوالے سے بہترین آپشن ثابت ہو سکتی ہیں۔انہوں نے کہا کہ سندھ حکومت شفاف سرمایہ کاری کے لیے ہر ممکن تعاون کرے گی اور عوام کو بہتر سہولیات کے ساتھ ساتھ سرمایہ کاروں کو پائیدار کاروباری ماحول فراہم کرنا حکومت کی ترجیح ہے۔
