ڈپٹی میئر کراچی سلمان عبداللہ مراد نے کہا ہے کہ نوجوان طالبعلم ہمارا قیمتی اثاثہ ہیں، ان کی حوصلہ افزائی اور رہنمائی ہمارے مستقبل کی ضمانت ہے،شہری امور میں نوجوانوں کی شرکت سے نہ صرف بہتر فیصلے کیے جا سکتے ہیں بلکہ جدید سوچ کے ذریعے کراچی کو ترقی کی راہ پر گامزن کیا جا سکتا ہے، پاکستان پیپلز پارٹی ہمیشہ سے نوجوانوں کو ترقی و خوشحالی کے سفر میں ہراول دستہ سمجھتی ہے، یہی وجہ ہے کہ بلدیہ عظمیٰ کراچی کے دروازے تعلیمی اداروں کے لیے کھلے ہیں تاکہ طلبہ عملی طور پر شہری نظام کو سمجھ سکیں، یہ بات ڈپٹی میئر کراچی نے جامعہ کراچی، حبیب یونیورسٹی اور میلینیئم انسٹیٹیوٹ آف ٹیکنالوجی انٹرپرینورشپ (MITE) کے طلبا و طالبات کے وفد سے صدر دفتر بلدیہ عظمیٰ کراچی کے مطالعاتی دورے کرنے کے بعد ملاقات کے موقع پر کہی، سٹی کونسل کے ایم سی میں ڈپٹی پارلیمانی لیڈر دل محمد، ڈائریکٹر میڈیا مینجمنٹ دانیال علیشان، سٹی انسٹیٹیوٹ آف امیج مینجمنٹ کے ڈائریکٹر محمد شاہد، این جی او شہری آرگنائزیشن کے نمائندے فرحان انوراور دیگر افسران بھی موجود تھے، اس موقع پر طلبا و طالبات کو بلدیہ عظمیٰ کراچی کے ارتقاء سے موجودہ میئر کراچی اور ڈپٹی میئر کراچی کی تمام کاوشوں سے روشناس کروایا گیا
جو وہ کراچی کی ترقی کے لئے کررہے ہیں، ڈپٹی میئر کراچی سلمان عبداللہ مراد نے ادارہ سم کے ڈائریکٹر کو ہدایت کی کہ شہر کی فلاح و بہبود کی دوڑ میں شامل کرنے کے لئے سٹی یوتھ کونسل کا قیام عمل میں لائیں، طلبا و طالبات کو مختلف محکموں، نظام کار، شہری منصوبہ بندی، لینڈ ریکارڈ، میونسپل سروسز، سٹی انسٹیٹیوٹ آف امیج مینجمنٹ اور شہری سہولیات سے متعلق امور کے بارے میں تفصیلی بریفنگ دی گئی، وفد نے میونسپل کمشنر آفس، 1339 کمپلین سینٹر، کونسل ہال اور بلدیاتی نظام کے دیگر شعبہ جات کا بھی معائنہ کیا، ڈپٹی میئر کراچی نے اس موقع پر مختلف سوالات کے جوابات دیئے اور طلبہ کو شہری منصوبہ بندی، بلدیاتی خدمات اور انتظامی ڈھانچے کے بارے میں آگاہ کیا، ڈپٹی میئر کراچی سلمان عبداللہ مراد نے کہا کہ بلدیہ عظمیٰ کراچی کے دفاتر، نظامِ بلدیات اور شہری خدمات کے بارے میں آگاہی حاصل کرنے کے لیے مختلف جامعات کے طلبا و طالبات کے مطالعاتی دورے جاری رہنے چاہئیں، ایسے مطالعاتی دورے نوجوانوں کے لیے سیکھنے اور اپنی صلاحیتوں کو نکھارنے کا بہترین موقع فراہم کرتے ہیں، ڈپٹی میئر کراچی نے اس موقع پر یونیورسٹی اساتذہ، طلبہ اور انتظامیہ کا شکریہ ادا کرتے ہوئے ان کے جذبے اور دلچسپی کو سراہا۔
