ایڈیشنل چیف سیکرٹری ڈویلپمنٹ مشتاق احمد کی زیرِ صدارت ایمرجنسی ورکس سکروٹنی کمیٹی کا ایک اہم اجلاس منعقد ہوا۔ اجلاس میں مختلف محکمہ جات کے سیکریٹریز، تینوں ڈویژنز کے کمشنرز، ڈپٹی کمشنرز اور متعلقہ محکموں کے ایگزیکٹو انجینئرز (EXENs) نے شرکت کی۔اجلاس میں گلگت بلتستان بھر میں جاری ایمرجنسی نوعیت کے کاموں کا تفصیلی جائزہ لیا گیا۔ فورم نے ایمرجنسی منصوبوں کی رفتار اور معیار پر تفصیلی غور و خوض کیا اور ہدایت کی کہ تمام کام مقررہ مدت میں اور اعلیٰ معیار کے مطابق مکمل کیے جائیں۔اجلاس میں نئے ایمرجنسی کاموں کی بھی منظوری دی گئی، جن میں دنیور چشمہ کی مکمل بحالی کا منصوبہ شامل ہے۔ XEN LG& RD نے اس حوالے سے بریفنگ دیتے ہوئے بتایا کہ مذکورہ کام کو دو ماہ کے اندر مکمل کیا جائے گا تاکہ عوام کو درپیش مسائل کا فوری ازالہ ممکن بنایا جا سکے۔۔ ایمرجنسی کاموں کے معیار اور رفتار کی مؤثر نگرانی کے لیے مختلف سیکریٹریز پر مشتمل کمیٹیاں تشکیل دی گئیں، جو دو ہفتوں کے اندر جاری ایمرجنسی کاموں سے متعلق اپنی رپورٹ پیش کریں گی۔ایڈیشنل چیف سیکرٹری ڈویلپمنٹ نے اس عزم کا اظہار کیا کہ حکومت گلگت بلتستان عوام کو درپیش مسائل کے فوری حل اور بنیادی سہولیات کی بحالی کے لیے تمام وسائل بروئے کار لا رہی ہے اور ایمرجنسی کاموں میں شفافیت، رفتار اور معیار کو یقینی بنایا جائے گا۔
