پنجاب پلاننگ اینڈ ڈویلپمنٹ بورڈ نے مالی سال 25-2024 کے صوبائی ڈویلپمنٹ ورکنگ پارٹی کے 66 ویں اجلاس میں لوکل گورنمنٹ اور ہیلتھ کئیر سیکٹرز کی 2 ترقیاتی سکیموں کے لیے مجموعی طور پر 8 ارب 18کروڑ روپے کے فنڈز کی منظوری دی گئی۔ اجلاس کی صدارت چیئرمین پلاننگ اینڈ ڈویلپمنٹ بورڈ بیرسٹر نبیل احمد اعوان نے کی۔
صوبائی ورکنگ پارٹی کے اجلاس میں ترقیاتی بورڈ کی جانب سےمریم نواز ہیلتھ کلینکس کے ذریعے صحت کی سہولیات کی عام آدمی تک رسائی کیلئے 8 ارب 15 کروڑ روپے کی منظوری دی گئی اور محکمہ صحت کو مریم نواز ہیلتھ کلینکس کو مزید بہتر ، جدید تر اور موثر بنانے کی ہدایت کی گئی۔ مزید ورکنگ پارٹی اجلاس میں کلوٹ اور ملحقہ آبادیوں میں واٹر سپلائی سکیم اور ڈیم کی تعمیر کے ذریعے پانی کے ذرائع کی ترقی (پی سی II) کیلئے 3کروڑ 69لاکھ کی منظوری بھی دی گئی۔اجلاس میں چیف اکانومسٹ محمد مسعود انور، متعلقہ سیکرٹریز، محکمہ جات کے اعلی افسران اور پنجاب پلاننگ اینڈ ڈویلپمنٹ بورڈ کے ممبران نے شرکت کی۔
