بینک آف خیبر پشاور میں اسلامی بینکاری کے اجراء کی تقریب منعقد ہوئی۔وزیراعلیٰ خیبر پختونخوا علی امین خان گنڈاپور نےتقریب میں بحیثیت مہمان خصوصی شرکت کی۔ مشیر خزانہ مزمل اسلم، سیکرٹری خزانہ اور دیگر بھی تقریب میں شریک ہوئے۔ وزیراعلیٰ علی امین خان گنڈاپور نے بینک آف خیبر میں اسلامی بینکاری کا اجراء کر دیا۔ دسمبر 2026 تک بینک آف خیبر مکمل طور اسلامی بینکاری پر منتقل ہوجائے گا۔ بینک آف خیبر میں اوورسیز پاکستانیوں کے لیے زرمبادلہ بھیجنے کے لئے ”کور پے“ کے نام سے سروس کا بھی آغاز۔ بینک آف خیبر کی خدمات کی برینڈنگ کے لیے ٹی وی کمرشلز کا بھی اجراء کیا گیا۔وزیراعلیٰ علی امین خان گنڈاپور نے افتتاح کی تقریب سے خطاب کرتے ہوئے کہا کہ
اسلامی بینکاری کے اجراء پر بینک آف خیبر انتظامیہ کو مبارکباد پیش کرتا ہوں، بینک آف خیبر میں نئے اقدامات کے اجراء سے شہریوں کو خدمات مزید بہتر انداز میں میسر ہونگی، مجھے نہایت خوشی ہے بینک آف خیبر اسلامی بینکاری کی طرف جا رہا ہے۔ بینک آف خیبر صوبے کا ایک اہم ادارہ ہے جو اپنے آپ کو منوا رہا ہے اور آگے بڑھ رہا ہے، بانی چیئرمین کے وژن کے مطابق ہم مالی خودمختاری کی طرف جا رہےہیں، ہم نے مالی لحاظ سے خودمختار ہونا ہے، اپنے اداروں کو مضبوط بناکر آمدن میں اضافہ کر رہے ہیں۔ اوورسیز پاکستانیوں سے گزارش ہے اپنے پیسے بینک آف خیبر کے ذریعے بھیجیں، سمندر پار پاکستانیوں کی آسانی کے لیے کور پے کے نام سے ایک الگ خدمت کا آغاز کر دیا گیا ہے۔ صوبائی حکومت کے بینک آف خیبر کے اشتراک سے متعدد اقدامات چل رہے ہیں، ان اقدامات میں سولر اسکیم، احساس روزگار پروگرام، احساس نوجوان پروگرام اور دیگر شامل ہیں۔ بینک آف خیبر صوبے میں صنعت لگانے والوں کو زیادہ سے زیادہ سپورٹ فراہم کرے، ہم صوبے میں سرمایہ کاری کے فروغ کے لیے مراعات دیں گے تاکہ سرمایہ کاری کو راغب کریں۔ ہم نے دنیا کے سامنے بطور قابل اعتبار صوبہ اور ملک اپنا امیج بنانا ہے۔
