وزیراعلیٰ سندھ سید مراد علی شاہ نے میمن میڈیکل انسٹی ٹیوٹ (ایم ایم آئی) اسپتال میں ابنِ سینا وارڈ، ابن الہیثم وارڈ اور الشفا آؤٹ پیشنٹ ڈپارٹمنٹ (او پی ڈی) کا افتتاح کیا اور اس توسیع کو صوبے میں معیاری صحت کی سہولیات کے فروغ کی جانب ایک اہم سنگ میل قرار دیا۔تقریب سے خطاب کرتے ہوئے وزیراعلیٰ نے کہا کہ نئی سہولیات مریضوں کو زیادہ آرام، وقار اور سہولت کے ساتھ علاج کی فراہمی کو یقینی بنانے میں مددگار ثابت ہوں گی جو عوامی فلاح و بہبود کے مضبوط عزم کی عکاسی ہے۔ انہوں نے اس عزم کا اعادہ کیا کہ حکومت سندھ صحت کے بنیادی ڈھانچے کی بہتری، خصوصی طبی خدمات کے فروغ اور معاشرے کے تمام طبقات کے لیے طبی سہولیات تک مساوی رسائی کو یقینی بنانے کے لیے مکمل طور پر پرعزم ہے۔ایم ایم آئی اسپتال کے اپنے 2017 کے دورے کو یاد کرتے ہوئے وزیراعلیٰ نے کہا کہ آغا خان یونیورسٹی اسپتال اور انڈس اسپتال کے بعد میمن میڈیکل انسٹی ٹیوٹ کراچی میں نجی شعبے کی سب سے بڑی طبی سہولیات میں سے ایک بن کر ابھرا ہے۔ انہوں نے اسپتال کے انتظام میں مخیر حضرات کے کردار کو سراہتے ہوئے اسے انسانیت کی قابلِ تحسین خدمت قرار دیا۔مراد علی شاہ نے کہا کہ کراچی جدید طبی علاج کی سہولیات کے حوالے سے دنیا بھر میں پہچانا جاتا ہے۔ انہوں نے زور دیا کہ ایسے شعبوں میں جہاں حکومت براہِ راست خدمات فراہم نہیں کر سکتی وہاں پبلک پرائیویٹ پارٹنرشپ اہم کردار ادا کرتی ہے۔ انہوں نے کہا کہ صحت کے شعبے میں حکومت سندھ انسانی وقار کے اصول پر عوام کی خدمت کر رہی ہے۔وزیراعلیٰ نے اعلان کیا کہ حکومت سندھ نئے افتتاح شدہ وارڈز کے لیے مشینری اور آلات کی فراہمی میں مکمل تعاون کرے گی۔ انہوں نے مزید کہا کہ ایم ایم آئی اسپتال سماعت سے محروم پیدا ہونے والے بچوں کو مفت علاج فراہم کرے گا جسے انہوں نے ایک اہم فلاحی اقدام قرار دیا۔تعلیم اور صحت کو خوشحال معاشرے کے بنیادی ستون قرار دیتے ہوئے مراد علی شاہ نے کہا کہ ایم ایم آئی اسپتال جیسے ادارے نہ صرف پیشہ ورانہ طبی خدمات فراہم کرتے ہیں بلکہ فلاحی پروگرامز کے ذریعے کمزور طبقات کی بھی مدد کرتے ہیں۔ انہوں نے ڈاکٹروں، نرسوں، عملے، ٹرسٹیز اور مخیر حضرات کی خدمات کو سراہا جن کی کاوشیں ، خدمت اور سماجی ذمہ داری کے جذبے کی عکاسی کرتی ہیں۔وزیراعلیٰ نے ایم ایم آئی کے سرپرست شبیر دیوان کے ساتھ اپنی ذاتی وابستگی کا بھی ذکر کیا اور انہیں دیرینہ دوست قرار دیتے ہوئے اعلان کیا کہ حکومت سندھ میمن میڈیکل انسٹی ٹیوٹ کے مجوزہ یونیورسٹی منصوبے میں تعاون کرے گی۔اپنے خطاب کے اختتام پر مراد علی شاہ نے صحت کے شعبے میں ہمدردی، معیار اور مساوات کو فروغ دینے والے اقدامات کے لیے حکومتی تعاون جاری رکھنے کی یقین دہانی کرائی اور کہا کہ اس نوعیت کی پبلک پرائیویٹ شراکت داری ایک صحت مند اور مستقبل کے لیے تیار سندھ کی تشکیل کے لیے ناگزیر ہے۔
*وزیراعلیٰ سندھ مراد علی شاہ نے میمن میڈیکل انسٹی ٹیوٹ میں نئے وارڈز کا افتتاح کردیا*
