وزیر بلدیات سندھ سید ناصر حسین شاہ کا لائنز ایریا پارکنگ پلازہ، جامع کلاتھ اور قیوم آباد میں واقع شاپنگ مالز کا تفصیلی دورہ

وزیر بلدیات سندھ سید ناصر حسین شاہ نے لائنز ایریا پارکنگ پلازہ، جامع کلاتھ اور قیوم آباد میں واقع شاپنگ مالز کا تفصیلی دورہ کیا اور کمرشل عمارتوں میں فائر اینڈ سیفٹی انتظامات، ایمرجنسی اخراجی راستوں اور مجموعی حفاظتی صورتحال کا جائزہ لیا، دورے کے موقع پر کمشنر کراچی سید حسن نقوی اور ڈی جی کے ڈی اے آصف جان صدیقی بھی ان کے ہمراہ موجود تھے، وزیر بلدیات سندھ نے موقع پر موجود افسران کو ہدایت دی کہ فائر فائٹنگ سسٹمز کی فعالی، پانی کے ریزروائر، فائر الارم، ایمرجنسی لائٹس اور ایگزٹ روٹس کی دستیابی کو یقینی بنایا جائے تاکہ کسی بھی ہنگامی صورتحال میں قیمتی انسانی جانوں کو محفوظ رکھا جا سکے، سید ناصر حسین شاہ نے کہا کہ عوامی مقامات پر حفاظتی غفلت ناقابل قبول ہے اور سندھ حکومت شہریوں کی جان و مال کے تحفظ کے لیے زیرو ٹالرنس پالیسی پر عمل پیرا ہے، انہوں نے واضح کیا کہ تمام شاپنگ مالز، سپر اسٹورز اور کمرشل پلازہ جات میں فائر اینڈ سیفٹی قوانین پر مکمل عملدرآمد نہ ہونے کی صورت میں متعلقہ انتظامیہ کے خلاف قانونی کارروائی کی جائے گی، وزیر بلدیات سندھ نے کمشنر کراچی اور ڈی جی کے ڈی اے کو ہدایت دی کہ شہر بھر میں واقع کمرشل عمارتوں کی جامع فائر اینڈ سیفٹی آڈٹ کر کے رپورٹ مرتب کی جائے اور جہاں خامیاں پائی جائیں وہاں فوری اصلاحی اقدامات کے ساتھ ساتھ متعلقہ مالکان کو پابند کیا جائے، انہوں نے مزید کہا کہ ایمرجنسی کی صورت میں عوام کے محفوظ انخلا کے لیے ایمرجنسی دروازے، سیڑھیاں اور راستے ہر وقت فعال، کھلے اور رکاوٹ سے پاک ہونے چاہئیں، وزیر بلدیات سندھ نے اس عزم کا اظہار کیا کہ کراچی سمیت سندھ بھر میں عوامی استعمال کی عمارتوں کو محفوظ بنانے کے لیے نگرانی کے نظام کو مزید مؤثر بنایا جائے گا اور کسی بھی قسم کی کوتاہی کی صورت میں بلاامتیاز کارروائی عمل میں لائی جائے گی