سیکرٹری بلدیات پنجاب شکیل احمد میاں نے نااہلی اور بدعنوانی پر بلدیہ عظمٰی لاہور کے زونل آفیسر پلاننگ طاہر محمود اور بلڈنگ انسپکٹر بلال احمد کو سزائیں دے دی ہیں۔انکوائری آفیسر میٹروپولیٹن آفیسر آرکیٹیکٹ ایم سی ایل ڈاکٹر رائے امتیاز حسن کی رپورٹ پر لوکل گورنمنٹ سروس ٹاؤن پلاننگ فنکشنل یونٹ گریڈ17 کے طاہر محمود گجر کی دو سال جبکہ بلڈنگ انسپکٹر نشتر زون بلال احمد کی چار سال کی سروس ضبط کی گئی ہے۔طاہر محمود گجر کے پاس بلدیہ عظمٰی لاہور کے بطور زونل آفیسر پلاننگ دو زون شالیمار اور نشتر کا چارج ہے۔محکمہ بلدیات کی جانب سے کارروائی پنجاب ملازمین کے تحت کارکردگی، نظم و ضبط اور احتساب ایکٹ 2006 کے تحت کی گئی ہے۔شکایت کنندہ سجاد حسین جو اہم حکومتی شخصیات کا عزیز بتایا جاتا ہے 12 کنال رقبہ پر فارم ہاؤس کے نقشہ کے لئے تین لاکھ روپے رشوت لینے اور اس کے باوجود نقشہ منظور نہ کرنے اور مزید رشوت کے لئے تاخیری حربوں کا الزام لگایا تھا۔انکوائری آفیسر نے درخواست پر انکوائری میں الزامات درست ثابت ہونے پر
زونل آفیسر پلاننگ اور بلڈنگ انسپکٹر کو سزا اور جرمانوں کی سفارش کی تھی جس پر سیکرٹری لوکل گورنمنٹ شکیل احمد میاں نے فیصلہ جاری کیا۔مزید کہا گیا ہے کہ رشوت دینے والا اور لینے والا دونوں مجرم ہیں۔
