وزیراعلیٰ سندھ سید مراد علی شاہ نے اسکیم 33 کی 4 یونین کونسلز میں سیوریج سسٹم کی ناکامی اور سندھ اسمبلی کے حلقہ 98 میں عوامی مسائل کے انبار پر شدید برہمی کا اظہار کرتے ہوئے متعلقہ اداروں کو فوری کارروائی کی ہدایت جاری کر دی ہے۔ وزیراعلیٰ سندھ نے اپنے سخت بیان میں کہا کہ "شہری علاقوں میں ناقص سیوریج اور بنیادی سہولیات کا فقدان کسی صورت برداشت نہیں کیا جائے گا۔ اسکیم 33 اور حلقہ 98 میں جن اداروں نے غفلت برتی ہے، ان کے خلاف کارروائی کی جائے گی۔ عوام کو مشکلات میں چھوڑنا ناقابلِ قبول ہے۔” انہوں نے کہا کہ حکومت سندھ شہریوں کو بہتر بنیادی سہولیات فراہم کرنے کے لیے پرعزم ہے اور کسی قسم کی کوتاہی یا نااہلی کو ہرگز برداشت نہیں کیا جائے گا۔ وزیراعلیٰ نے وزیر بلدیات، کمشنر کراچی اور ایم ڈی واٹر بورڈ کو ہدایت کی ہے کہ اسکیم 33 کی تمام متاثرہ یونین کونسلز میں فوری طور پر سروے مکمل کیا جائے اور ہنگامی بنیادوں پر سیوریج نظام کی مرمت و بحالی کا کام شروع کیا جائے۔ انہوں نے مزید کہا کہ "حلقہ 98 سمیت تمام شہری حلقوں میں جہاں عوامی مسائل بڑھتے جا رہے ہیں، وہاں حکومتی رٹ کو بحال کیا جائے گا اور ہر سطح پر جوابدہی یقینی بنائی جائے گی۔” وزیراعلیٰ نے متعلقہ اداروں کو تین دن میں رپورٹ پیش کرنے کی ہدایت بھی جاری کر دی ہے۔
