وزیر بلدیات سندھ سعید غنی نے ڈسٹرکٹ ایسٹ کے مختلف علاقوں کا دورہ کیا۔صوبائی وزیر نے ڈسٹرکٹ ایسٹ میں صفورا ٹاؤن کی مختلف یونین کونسلز میں بارشوں کے بعد کی صورتحال کا جائزہ لیا۔اس موقع پر چیئرمین صفورا ٹاؤن راشد خاصخیلی، ریاض بلوچ، عبدالحق بلوچ، شمیم صدیقی، بشیر خاصخیلی و دیگر بھی ان کے ہمراہ موجود تھے۔صوبائی وزیر نے جن جن علاقوں میں پانی کی نکاسی میں درپیش مسائل تھے اس پر متعلقہ حکام کو ہدایات دیتے ہوئے فوری طور پر نکاسی کے عمل کو یقینی بنانے کے احکامات دئیے۔
اس وقت بارشوں کے بعد سڑکوں کا انفراسٹرکچر ضرور متاثر ہوا ہے، لیکن بارشوں کے ختم ہوتے ہی ان پر کام کا آغاز کردیا جائے گا۔ سعید غنی نے مزید کہا کہ بارشوں کے پانی جمع ہونے سے سڑکوں اور گلیوں میں گڑھے پڑ جانا اور انفراسٹرکچر متاثر ہونا کوئی نئی بات نہیں ہے۔ ہماری اولین ترجیح پانی کی نکاسی اور گلی کوچوں میں صفائی کو یقینی بنانا ہے۔
بارشوں کے سلسلے کے خاتمے کے ساتھ ہی سڑکوں اور گلیوں میں انفراسٹرکچر کے کام کا فوری آغاز کردیا جائے گا۔وزیر بلدیات سندھ سعید غنی نے ہفتہ کے روز طارق روڈ پر سیوریج کی 24 انچ کی لائن کے جاری کام کا بھی معائنہ کیا۔
صوبائی وزیر کے ہمراہ ٹائون چیئرمین چنیسر ٹاؤن فرحان غنی، میونسپل کمشنر اقرار جلبانی، لیبر کونسلر قمر احمد، ایس ای واٹر بورڈ اعجاز احمد، ایکس ای این ارشد اور دیگر بھی ان کے ہمراہ موجود تھے۔
صوبائی وزیر کو بتایا گیا کہ مذکورہ 24 انچ کی سیوریج لائن گذشتہ روز بارشوں کے باعث زمین بوس ہوگئی تھی، جس پر فوری طور پر کام کا آغاز کرتے ہوئے لائن کو تبدیل کردیا گیا ہے۔لائن کی مرمت کے بعد فوری طور پر سیوریج کی روانی کو شروع کردیا جایے۔ سعید غنی نے کہا کہ ہماری بھرپور کوشش ہونی چاہیے کہ عوام کو کسی قسم کی پریشانی کا سامنا نہ کرنا پڑے۔ اس وقت بارشوں کے بعد شہر میں تمام ٹائونز کی انتظامیہ نے بروقت جو اقدامات کئے ہیں وہ تسلی بخش ہیں۔ اس وقت کم و بیش تمام علاقوں سے پانی کی نکاسی کا کام مکمل کرلیا گیا ہے۔ جن گلیوں اور چھوٹی سڑکوں پر پانی جمع ہے اس کی نکاسی کے لئے بلدیاتی عملہ دن و رات کوشاں ہے۔
