لاہور ہائیکورٹ کےجسٹس راحیل کامران شیخ نےمخصوص نشستوں کے فیصلے پر عمل درآمد کرانے کیلئے درخواست پر پی ٹی آئی و دیگر سیاسی جماعتوں کو 9 اکتوبر کیلئے نوٹس جاری کر دیئے،عدالت نے پی ٹی آئی کو نوٹس جاری نہ کرنے پر متعلقہ عدالتی افسر پر اظہار برہمی کیا،
ہائیکورٹ آفس کے اہلکار نے غلطی تسلیم کر کے معافی کی استدعا کی جس پر عدالت نے کہا کہ آئندہ غلطی نہ ہو ، وفاقی حکومت ، الیکشن کمیشن اور اٹارنی جنرل پاکستان نے جواب داخل کرا دیا،ایڈیشنل اٹارنی جنرل نے موقف اپنایا کہ سپریم کورٹ کے فیصلے میں وہاں ہی عملدرآمد کیلئے رجوع کرنے کا لکھا ہے، عدالت نے ریمارکس دیئے کہ آئین کے تحت متعلقہ سیاسی جماعتوں کو بھی سننا چاہیے،وکیل درخواست گزار نے موقف اپنایا کہ سپریم کورٹ سیاسی جماعتوں کو سن چکی ہے ،ہم صرف عدالتی فیصلے پر عملدرآمد کیلئے آئے ہیں ،اس سٹیج پر کسی سیاسی جماعت کو سننا عدالت کیلئے ضروری نہیں، سیاسی جماعتیں ہی تو آئین اور سسٹم کے ساتھ کھلواڑ کررہی ہیں، پارلیمان نے 11 غیر آئینی قانون بنائے جن کو چیلنج کر رکھا ہے ،مخصوص نشستوں کے حوالے سے سپریم کورٹ کے آٹھ رکنی بنچ کا وضاحتی فیصلہ آچکا ہے ،سپریم کورٹ کا تفصیلی بھی فیصلہ آچکا ہے ،سپریم کورٹ کے فیصلے پر تاحال عملدرآمد نہیں کیا گیا ،چاروں صوبائی اسمبلی کے اسپیکرز کو بھی مراسلہ جاری کرچکے ہیں ،مخصوص نشستیں پاکستان تحریک انصاف کو تاحال نہیں ملی ،استدعا ہے کہ عدالت پی ٹی آئی کو مخصوص نشستیں دینے کا حکم دے ۔
