صوبائی وزیر برائے ہاؤسنگ بلال یاسین نے حضرت پیر مکی کے 836 ویں عرس کی تقریبات میں خصوصی شرکت کی۔ صوبائی وزیر بلال یاسین نے سیکرٹری اوقاف ڈاکٹر احسان بھٹہ کے ہمراہ دربار پر حاضری دی دعا اور چادر پوشی کی۔عرس کے موقع پر صوبائی وزیر نے کیک کاٹا، زائرین اور عقیدت مندوں میں لنگر بھی تقسیم کیا۔ اس موقع پر وزیر ہاؤسنگ بلال یاسین کا کہنا تھا کہ حضرت پیر مکیؒ ایک عظیم صوفی بزرگ اور روحانی شخصیت تھے، عرس کی تقریبات ہمارے صوفیاء کرام کی تعلیمات اور روحانی ورثے سے وابستگی کی تجدید کا موقع ہیں۔ بزرگانِ دین نے ہمیشہ معاشرے میں برداشت، رواداری، اخوت اور خدمتِ خلق کو فروغ دیا۔ آج ہمیں صوفیاء کرام کی تعلیمات کو اپنی عملی زندگی کا حصہ بنانے کی ضرورت ہے۔ پاکستان خصوصاً پنجاب کی ثقافت اور تاریخ صوفیاء کرام کی امن و محبت کی تعلیمات سے گہری وابستگی رکھتی ہے۔ وزیر اعلیٰ پنجاب مذہبی و روحانی مقامات کی تزئین و آرائش، اور تاریخی ورثے کے تحفظ کیلئے بھرپور اقدامات کر رہی ہیں۔ اللہ تعالیٰ پاکستان کو امن، خوشحالی اور استحکام عطا فرمائے۔
*صوبائی وزیر برائے ہاؤسنگ بلال یاسین کی حضرت پیر مکی کے 836 ویں عرس کی تقریبات میں خصوصی شرکت*
