لاہور(بلدیات ٹائمز رپورٹ)پنجاب کے بلدیاتی اداروں کا پی ایف سی ڈویلپمنٹ شیئر بحال نہیں ہوسکا۔صوبہ کے 229 بلدیاتی اداروں کو 2 ارب 95 کروڑ 87 لاکھ روپے کا ماہانہ کرنٹ پی ایف سی شیئر جاری کردیا گیا ہے۔یہ شیئر اپریل کا ریلیز ہوا ہے۔محکمہ خزانہ پنجاب کی طرف سے جاری کردہ نوٹیفکیشن کے مطابق میٹروپولیٹن کارپوریشن لاہور کو 17 کروڑ 22 لاکھ 62 ہزار روپے منتقل کردیئے گئے ہیں۔پنجاب کی 35 ضلع کونسلوں کو مجموعی طور پر ایک ارب 23 لاکھ روپے کا کرنٹ پی ایف سی شیئر ٹرانسفر کیا گیا ہے جبکہ 182 میونسپل کمیٹیوں کے لئے ایک ارب 39 کروڑ 47 لاکھ روپے جاری ہوئے ہیں۔صوبائی مالیاتی کمیشن آیوارڈ کے تحت 11 میونسپل کارپوریشنز کو 37 کروڑ 94 لاکھ 41 ہزار روپے کا اجراء کیا گیا ہے ۔ان میں میونسپل کارپوریشن بہاولپور کو ایک کروڑ 41 لاکھ 64 ہزار روپے ڈی جی خان 2 کروڑ 82 لاکھ 66 ہزار روپے فیصل آباد 7 کروڑ 62 لاکھ 55 ہزار روپے گجرات 2 کروڑ 76 لاکھ 35 ہزار روپے گوجرانوالہ 2 کروڑ 59 لاکھ 53 ہزار روپے مری ایک کروڑ 32 لاکھ روپے ملتان 4 کروڑ 98 لاکھ 39 ہزار روپے راولپنڈی 2 کروڑ 68 لاکھ 73 ہزار روپے ساہیوال 3 کروڑ 46 لاکھ روپے سرگودھا 3 کروڑ 64 لاکھ روپے اور میونسپل کارپوریشن سیالکوٹ کے لئے 4 کروڑ 61 لاکھ روپے کی گرانٹ جاری ہوئی ہے۔پی ایف سی ڈویلپمنٹ شیئر کی بحالی کے حوالے سے موجودہ حکومت کی طرف سے بھی پیش رفت نہیں ہو سکی ہے جس کی وجہ سے بلدیاتی اداروں کے لئے آئندہ مالی سال کے بجٹ میں سالانہ ترقیاتی پروگرام تشکیل دینا مشکل ہو گا وہ ڈویلپمنٹ شیئر کے بغیر کئی سالوں سے کوئی بڑا منصوبہ شروع کرنے سے قاصر ہیں۔
