لاہور ویسٹ مینجمنٹ کمپنی کی جانب سے شہر بھر میں صفائی کی بہترین اور بروقت سہولیات کی فراہمی کے لیے صفائی آپریشن جاری ہے۔لاہور کے تمام 9ٹاؤنز میں ایل ڈبلیو ایم سی کے افسران اور ورکرز فیلڈ میں متحرک ہیں جبکہ شہر کے مختلف علاقوں میں سرپرائز چیکنگ کے دوران سی ای او ایل ڈبلیو ایم سی بابر صاحب دین نے ورکرز کی حاضری اورصفائی انتظامات کا جائزہ لیا۔ صفائی کے ناقص انتظامات پر زونل آفیسر خواجہ عثمان اور سپر وائزرفریاد کی سرزنش کی اور وارننگ جاری کی۔سروس لینز میں ملبے کی چھوٹی ڈھیریاں فوری کلیئر کروانے اورمین شاہراہوں کے ساتھ ساتھ سروس لینز پر بھی مینوئل سویپنگ یقینی بنانے کی ہدایات جاری کیں۔مزید برآں شہر میں صفائی صورتحال برقرار رکھنے کے لیے سی ای او ایل ڈبلیو ایم سی نے فردوس مارکیٹ، مدینہ کالونی، گلبہار کالونی،سیون اپ پھاٹک، گرومانگٹ روڈ، نور جہاں روڈ، ایم ایم عالم روڈ،نور جہاں روڈ، علی زیب روڈ، حالی روڈ کا دورہ کیا اورجیل روڈ، مین بلیوارڈ گلبرگ، کالج روڈ، غالب روڈ پر بھی صفائی انتظامات کا جائزہ لیا۔
سی ای او ایل ڈبلیو ایم سی کا کہنا ہے کہ لاہوریوں کو صاف ستھرا ماحول فراہم کرنا ہی اولین ترجیح ہے۔ شہریوں سے التماس ہے کہ ایل ڈبلیو ایم سی ٹیموں کا ساتھ دیں، کوڑا کوڑے دان میں پھینکیں یا ایل ڈبلیو ایم سی ٹیموں کے حوالے کریں۔ صفائی سے متعلق شکایات اور تجاویز کے لیے ایل ڈبلیو ایم سی کی ہیلپ لائن 1139پر رابطہ کریں یا سوشل میڈیا کا استعمال کریں۔
