چیئرمین سی ڈی اے محمد علی رندھاوا کی زیر صدارت اسلام آباد فیڈر بسوں کے روٹس کے حوالے سے جائزہ اجلاس بدھ کو سی ڈی اے ہیڈ کوارٹرز میں منعقد ہوا۔ اجلاس میں سی ڈی اے کے ممبران اور متعلقہ افسران نے شرکت کی۔ چیئرمین سی ڈی اے محمد علی رندھاوا نے ہدایت کی کہ ترنول سے سیکرٹریٹ، بہارہ کہو سے پیر ودھائی اور روات چوک سے سیکرٹریٹ سمیت مختلف روٹس پر فیڈر بسیں چلانے کے لیے کام شروع کیا جائے۔ انہوں نے ہدایت کی کہ فیڈر بس روٹس کی منصوبہ بندی کرتے ہوئے اس بات کو یقینی بنایا جائے کہ یہ روٹس اسلام آباد کے مرکز، یونیورسٹیوں، ہسپتالوں اور دیگر اہم مقامات کے قریب سے گزریں۔
چیئرمین سی ڈی اے نے کہا کہ عوام کی سہولت کو مدنظر رکھتے ہوئے فیڈر بسوں کے لیے ایک ایپ لانچ کی جائے۔ انہوں نے اس بات پر بھی زور دیا کہ مستحق افراد اور بزرگ شہریوں کے لیے سبسڈی فراہم کرنے کے لیے کام کیا جانا چاہیے۔ انہوں نے ہدایت کی کہ فیڈر بس سروس استعمال کرنے والے شہریوں کے لیے ہفتہ وار اور ماہانہ بنیادوں پر کارڈ سسٹم متعارف کرایا جائے۔چیئرمین سی ڈی اے محمد علی رندھاوا نے مزید ہدایت کی کہ بس ٹرمینلز پر اشتہارات کے لیے ڈیجیٹل بورڈز لگائے جائیں اور تمام بس ٹرمینلز کو جدید ترین سہولیات سے آراستہ کیا جائے۔ میٹنگ کے اختتام پر، سی ڈی اے کے چیئرمین نے ایک اعلیٰ معیار، کفایت شعاری، اور ماحول دوست ٹرانسپورٹ نیٹ ورک قائم کرنے کے عزم کا اعادہ کیا۔
