خیبر پختونخوا میں سیاحت کے فروغ کے لئے صوبائی حکومت کا منفرد اقدام،میزبان کے نام سے ہوم اسٹے ٹورازم پروگرام کا اجراء۔ کر دیا گیا۔وزیر اعلٰی ہاؤس میں تقریب کا انعقاد، پروگرام پر عمل درآمد کے لئے محکمہ سیاحت اور بینک آف خیبر کے درمیان مفاہمت کی یادداشت پر دستخط کئے گئے۔ وزیراعلٰی علی امین گنڈاپور تقریب کے مہمان خصوصی تھے۔ یہ پراجیکٹ ابتدائی طور پر 39.5 کروڑ روپے کی لاگت سے شروع کیا جارہا ہے۔ ابتدائی طور پر یہ منصوبہ صوبے کے 7 اضلاع اپر چترال، لوئر چترال، اپر دیر، لوئر دیر، مانسہرہ، ایبٹ آباد اور سوات میں شروع کیا جارہا ہے۔ منصوبے کے تحت مقامی لوگوں کے گھروں میں سیاحوں کو معیاری رہائشی سہولیات کی فراہمی کےلئے 30 لاکھ روپے تک کے بلاسود قرضے فراہم کئے جائیں گے۔ یہ بلا سود قرضے بینک آف خیبر کے ذریعے فراہم کئے جائیں گے۔سیاحوں کو اپنے گھروں کے احاطے میں رہائشی سہولیات فراہم کرنے کے خواہشمند افراد پہلے سے دستیاب کمروں کی تزئین و آرائش یا دو نئے کمرے تعمیر کر سکیں گے۔ سیاحوں کو ان کمروں میں واش رومزاور کچن سمیت دیگر تمام ضروری سہولیات میسر ہوں گی۔ قرضوں کی واپسی کی مدت 5 سال ہوگی اور واپسی کا عمل قرضہ وصولی کے دوسرے سال سے شروع ہوگا۔ وزیر اعلٰی علی امین گنڈاپور نے کہا ہے کہ ہوم اسٹے ٹورازم پراجیکٹ سیاحت کے فروغ کےلئے صوبائی حکومت فلیگ شپ منصوبہ ہے، میزبان پروگرام کے اجراء سے نا صرف سیاحوں کو قیام کی معیاری اور محفوظ سہولیات میسر ہوں گی بلکہ یہ مقامی عوام کےلئے روزگار کا بھی بہترین ذریعہ ثابت ہوگا۔صوبائی حکومت سیاحت کو بطور صنعت فروغ دینے پر کام کر رہی ہے، ایک طرف موجود سیاحتی مقامات پر سہولیات کی فراہمی یقینی بنائی جارہی ہے تو دوسری طرف نئے سیاحتی مقامات کی ترقی پر بھی پیشرفت جاری ہے، صوبے میں سیاحت کو فروغ دیکر لوگوں کے لئے روزگار کے مواقع پیدا کئے جائیں گے۔
