چیئرمین سی ڈی اے محمد علی رندھاوا سے ماہر ماحولیات رضوان محبوب نے سی ڈی اے ہیڈ کوارٹرز میں ملاقات کی. ملاقات میں ممبر انوائرمنٹ اور ڈی جی انوائرمنٹ بھی شریک ہوئے.ملاقات میں اسلام آباد میں جنگلات اور ماحولیات کے تحفظ سمیت رواں برس شجرکاری مہم کو وسیع پیمانے پر شروع کرنے کے حوالے سے تبادلہ خیال کیا گیا.چیئرمین سی ڈی اے محمد علی رندھاوا نے فائر سیزن سے قبل مارگلہ ہلز نیشنل پارک میں آگ لگنے کے واقعات کو کنٹرول کرنے کیلئے حکمت عملی تیار کرنے پر زور دیا. ملاقات میں ماہر ماحولیات رضوان محبوب نے رضا کارانہ طور پر سی ڈی اے کو فاریسٹ فائر سے نمٹنے اور اسکی روک تھام کیلئے اپنے تعاون کا یقین بھی دلایا.چیئرمین سی ڈی اے محمد علی رندھاوا نے کہا کہ شجرکاری کیلئے ہیلی کاپٹر اور ڈرون کے ذریعے بیج بونے کیلئے ائیر سپرے کا استعمال کیا جائے گا. انہوں نے ہدایت کی کہ شجرکاری مہم میں تعلیمی اداروں کے طلباء و طالبات سمیت کارپوریٹ سیکٹر کو بھی شامل کیا جائے. چیئرمین سی ڈی اے نے کہا کہ اسلام آباد میں ٹورزم کے فروغ کیلئے سفاری پارک سمیت مختلف منصوبوں کا آغاز بھی کیا جارہا ہے.
