وزیر بلدیات ذیشان رفیق کی زیرصدارت لوکل گورنمنٹ ایکٹ کی تیاری کیلئے اجلاس منعقد ہوا۔سول سیکرٹریٹ میں منعقدہ اجلاس میں نئے ایکٹ کے حوالے سے مختلف تجاویز پر غور کیا گیا۔کمیٹی کے ممبر ارکان پنجاب اسمبلی اور متعلقہ افسروں نے اجلاس میں شرکت کی۔سیالکوٹ، اوکاڑہ اور رحیم یار خان کا بلدیاتی درجہ بڑھانے کی تجویز پر بھی غور کیا گیا۔ پانچ لاکھ سے زائد آبادی اور ڈویژنل ہیڈکوارٹرز میں میٹروپولیٹن کارپوریشن بنانے کی تجویز کا بھی جائزہ لیا گیا۔اجلاس،میں یونین کونسل کی آبادی کے تعین اور ٹائون کمیٹیوں کے قیام پر مشاورت کی گئی۔صوبائی وزیر بلدیات ذیشان رفیق نے کہا کہ نئی قانون سازی میں سابق تجربات کو مدنظر رکھا جائے گا۔وزیراعلی مریم نواز شریف پنجاب میں ایک موثر بلدیاتی نظام چاہتی ہیں۔کمیٹی اپنی سفارشات صوبائی کابینہ کو بھجوائے گی۔نئی قانون سازی سے قبل تمام پہلوئوں پر غور کیا جا رہا ہے۔وزیر بلدیات ذیشان رفیق نے کہا ہے کہ مسلم لیگ ن پنجاب میں بلدیاتی انتخابات سے بھاگ نہیں گئی ۔نئے بلدیاتی قوانین اور نظام کے حوالے سے اپوزیشن کو بھی اعتماد میں لیا جائے گا۔ایسا بہترین بلدیاتی نظام دیں گے جس کو آئین میں تحفظ حاصل ہوگا اسے تبدیل نہیں کیا جا سکے گا۔
