صوبائی وزیر بلدیات پنجاب میاں ذیشان رفیق نے کہا ہے کہ پنجاب سوشو اکنامک سروے صوبے کی عوام کی ترقی اور خوشحالی کا عظیم منصوبہ ہے جس کا مقصد پنجاب کے مستحق افراد کی حکومت کی جانب سے معاونت اور شراکت داری ہے، کسان کارڈ ہو یا اپنا چھت اپنا گھر یا رمضان پیکج ہر سہولت کی حقدار تک فراہمی کیلئے ایک مستند ڈیٹا بیس کی ضرورت تھی جو پی ایس آئی آر کی صورت میں موجود ہیں اس کی ذمہ داری بلدیات کے محکموں کو سونپی گئی ہے اور صوبہ بھی 4 ہزار سے زائد یونین کونسل اور ٹاؤن کمیٹیوں میں قائم رجسٹریشن سنٹر 15 فروری تک رات گئے تک کام کریں گے جہاں پر شہری اپنے شناختی کارڈ ، ب فارم کے ساتھ جاکر رجسٹرڈ کروا سکتے ہیں اور رمضان پیکج سمیت حکومت کی جانب سے تمام مراعات حاصل کرسکتےہیں۔
یہ بات انہوں نے اپنے حلقہ انتخاب کی ٹاؤن کمیٹی جامکے میں پی ایس ایس آر سنٹر کے افتتاح کرکے موقع پر منعقدہ تقریب سے خطاب کرتے ہوئے کہی۔ڈپٹی ڈائریکٹر لوکل گورنمنٹ عمر امجد بیگ، نمبر دار ملک امجد اعوان نمبردار سمیت معززین علاقہ بھی تقریب میں شریک تھے۔صوبائی وزیر بلدیات میاں ذیشان رفیق نے کہا کہ پنجاب کے نئے بلدیاتی نظام میں ٹاؤن کمیٹی جامکے کو میونسپل کمیٹی کا درجہ دیا جائے گا کیونکہ جامکے چیمہ ایک چھوٹا سا شہر بن چکا ہے اور یہاں کے باسیوں کا یہ حق ہے کہ ان کو شہر والی سہولیات فراہم کی جائیں۔صوبائی وزیر بلدیات میاں ذیشان رفیق نے کہا کہ عمران نیازی کو سابق چیف جسٹس بابے رحمت نے جعل سازی سے اقتدار میں پہنچایا اور 2017 میں پھلتے پھولتے پاکستان کو کھنڈرات میں تبدیل کردیا ، انہوں نے بانی پی ٹی آئی یہودیوں اور اسرائیل کا ایجنٹ ہے اور اس نے اقتدار میں آکر ہر وہ کام کیا جس ملکی سلامتی اور استحکام کے خلاف ہو۔ بچوں کے ہاتھوں سے لیب ٹاپ لیکر ان کے ہاتھوں میں پٹرول بم پکڑا دیئے اور نوجوانوں کو اپنی ہی فوج سے بدگمان کردیا۔ انہوں نے کہا کہ مسلم لیگ ن کی حکومت ملک مین ترقی اور خوشحالی کی ضامن ہے اور خدمت کا یہ سفر جاری و ساری رہے گا۔
