ڈپٹی کمشنر لاہور سید موسیٰ رضا کی ہدایت پر ضلعی انتظامیہ نے جشنِ عید میلاد النبی ﷺ اور یومِ دفاع پاکستان کے موقع پر لاہور کو روشنیوں سے سجانے کے لیے شاندار اقدامات اٹھائے ہیں۔ شہر کی اہم شاہراہوں بشمول مال روڈ، کینال روڈ اور دیگر مقامات پر برقی قمقموں کا خوبصورت انتظام کیا گیا ہے۔ لاہور کے داخلی اور خارجی راستوں پر خصوصی روشنیوں سے شہر کی خوبصورتی کو دوبالا کیا گیا ہے۔ تاریخی عمارتوں اور سرکاری دفاتر کو سبز اور سفید روشنیوں سے سجایا گیا ہے تاکہ قومی اور مذہبی جذبے کو اجاگر کیا جا سکے۔ ڈی سی لاہور نے ہدایت دی ہے کہ تمام متعلقہ محکمے آپس میں رابطے میں رہیں اور تہواروں کے احترام کو یقینی بنائیں۔ انہوں نے کہا کہ شہر کو روشنیوں سے سجانا لاہور کی تہذیبی اور ثقافتی روایات کا اہم حصہ ہے۔ انتظامیہ کا مقصد لاہور کو اس کے اصل نام "روشنیوں کا شہر” کی عملی تصویر بنانا ہے۔ ڈپٹی کمشنر نے زور دیا کہ یہ تہوار اتحاد اور یگانگت کا پیغام دیتے ہیں اور انہیں ملی جوش و جذبے سے منایا جائے گا۔ ضلعی انتظامیہ کی ان کوششوں سے شہریوں میں خوشی کی لہر دوڑ گئی ہے اور لاہور کی خوبصورتی مزید نمایاں ہوئی ہے۔
