وزیر زراعت و لائیو سٹاک پنجاب سید عاشق کرمانی کی زیر صدارت پنجاب میونسپل ڈویلپمنٹ فنڈ کمپنی ہیڈ آفس لاہور میں اہم اجلاس منعقد ہوا۔جس میں چئیرمین پی ایم ڈی ایف سی عماد افتخار ملک ،قمر الزمان ،بورڈ ممبر ،ایم ڈی سید زاہد عزیز اور دیگر افسران نے شرکت کی۔چیئرمین پی ایم ڈی ایف سی عماد افتخار ملک نے صوبائی وزیر کو بریفنگ میں بتایا کہ پنجاب کی تاریخ میں پہلی بار وزیر اعلٰی پنجاب کی ہدایت پر صوبہ کےلئے سیوریج نظام کی بہتری کے لیے انقلابی منصوبے شروع کئے گئے ہیں۔انھوں نے کمپنی کے تحت جاری سیوریج اور دیگر منصوبوں پر تفصیلا آگاہ کیا۔
اس موقع پر صوبائی وزیر زراعت و لائیو سٹاک سید عاشق حسین کرمانی نے کہا کہ وزیر اعلٰی پنجاب نے صوبہ بھر کے لیے سیوریج اور سنیٹیشن کے نظام میں بہتری کے لیے اربوں روپے کے فنڈز مختص کئے ہیں۔انھوں نے کہا کہ جامع سیوریج نظام کے تحت ویسٹ واٹر ٹریٹمنٹ پلانٹس کا پانی زرعی شعبے کے لیے زیر استعمال لانے کی ضرورت ہے۔انھوں نےپی ایم ڈی ایف سی کی بہترین کارکردگی کو سراہا اور کہا کہ کمپنی نے سیوریج سے متعلقہ مسائل میں خاطر خواہ کمی کے لیے اچھا کام کر رہی ہے۔کمپنی کے تحت بارشی پانی کے سٹوریج اور نکاسی کے لئے انڈر گراونڈ واٹر ٹینکس کا منصوبہ قابل تحسین ہے۔
صوبائی وزیر نے مزید کہا کہ جدید ٹیکنالوجی کے استعمال سے پنجاب کا ہر شہر آئندہ دو سالوں میں بہترین سہولیات سے آراستہ ہو جائے گا۔سید عاشق حسین کرمانی نےکمپنی کو شہریوں کو سیوریج اور سینی ٹیشن کے بارے میں ایجوکیٹ کرنے کے لئے بھرپور آگاہی مہم چلانے کی ہدایت کی۔
چیرمین پی ایم ڈی ایف سی عماد افتخار ملک نے مزید کہا کہ وزیر اعلی پنجاب کی ہدایات کے مطابق صوبے میں میونسپل سروسز خصوصا سیوریج نظام کی بہتری کے لئے کام جاری ہے۔ پنجاب سٹیز پروگرام کے تحت سولہ شہروں میں پارکس، روڈز اور سٹریٹ لائٹس کی تنصیب کے پراجیکٹس کامیابی سے مکمل کر لیے ہیں۔ایم ڈی سید زاہد عزیز نے اس موقع پر کہا کہ انڈر گراؤنڈ واٹر سٹوریج ٹینکس کے ذریعے شہر کے پارکس میں آبپاشی کے لیے پانی استعمال ہو سکے گا۔
