کراچی (5 اپریل):وزیراعلیٰ سندھ سید مراد علی شاہ نے سندھ حکومت اور ایس او ایس چلڈرن ولیجز کے درمیان پائیدار تعاون کے اعتراف میں تعلیمی انفراسٹرکچر کی ترقی کے لیے 437 ملین روپے کی مالیاتی سپورٹ کے ساتھ ساتھ کراچی، خیرپور اور جامشورو میں زمین کی فراہمی کا اعلان کیا۔
وزیراعلیٰ سندھ ذاتی مصروفیات کی بناپرتقریب میں شرکت نہ کرسکے، اس ضمن میں وزیر بلدیات سعید غنی نے تقریب میں وزیراعلیٰ سندھ کی نمائندگی کی اور ان کا پیغام پڑھ کر سنایا۔ سندھ میں ایس او ایس چلڈرن ولیجز کی جانب سے فراہم کی جانے والی چار دہائیوں کی خدمات کی مناسبت سے ہفتہ کو وزیراعلیٰ ہاؤس میں منعقدہ ایک خصوصی تقریب کے دوران وزیراعلیٰ سندھ نے دلی مبارکباد پیش کی اور صوبے میں پسماندہ بچوں کی زندگیوں کو بہتربنانے کے لیے تنظیم کے مشن کے فروغ کے لیے صوبائی حکومت کی مستقل حمایت کا اعادہ کیا۔ تقریب میں معزز سامعین ، بشمول ایس او ایس چلڈرن ولیجز انٹرنیشنل کے صدر ڈاکٹر ڈیریجے ورڈوفا، ایس او ایس پاکستان کے نو منتخب صدر شاہد حمید، ایس او ایس سندھ کے چیئرمین جاوید جبار، سیکریٹری ایس او ایس سندھ محترمہ نورین حمید، ایس او ایس صدر کے ایگزیکٹو اسسٹنٹ مسٹر پیٹر سیفر کے ساتھ ساتھ سفارت کاروں، کاروباری نمائندوں، مخیر حضرات، رضاکاروں اور ایس اوایس ولیجز سے وابستہ بچوں نے شرکت کی۔
وزیراعلیٰ سندھ نے اپنے خطاب میں کہا کہ ایس او ایس ماڈل بے سہارا بچوں کے لیے ایک مثالی سسٹم ہےجو والدین کی حمایت سے محروم بچوں کو خاندان جیسی دیکھ بھال فراہم کرتا ہے۔ انہوں نے کہا کہ ایس او ایس چلڈرن ولیجز کا منفرد ڈھانچہ جہاں ایک نیک دل عورت 8 سے 10 بچوں کی ماں بنتی ہے جو انہیں ایک پیار بھرا اور محفوظ گھر فراہم کرتی ہے اور ساتھ ساتھ ایک خاندانی نظام کو بحال رکھتی ہے جوکہ زندگی کی سب سے تلخ حقیقت کو شفقت بھرے معاشرے میں بدل دیتی ہے۔ مراد علی شاہ نے اس ماڈل کو گزشتہ 75 سالوں میں کامیابی کے ساتھ 132 ممالک تک پھیلانے پر ایس او ایس انٹرنیشنل کی عالمی قیادت کی تعریف کی جس کا صدر دفتر آسٹریا میں ہے ۔ پاکستان میں ایس او ایس چلڈرن ولیجز کی وژنری بانی مسز ثریا انور کو خصوصی اعزاز سے نوازاگیا جنہوں نے 1975 میں اس تحریک کی بنیاد رکھی۔وزیراعلیٰ سندھ نے ایس او ایس چلڈرن ولیجز سندھ کو 1985 میں کراچی میں پہلے ایس او ایس ولیج کے قیام سے شروع ہونے والی مؤثر خدمات کے 40 سال مکمل ہونے پر مبارکباد دی۔ اس کے بعد سے تنظیم نے اپنے دائرہ کار کو جامشورو اور خیرپور تک پھیلا یا جس سے سینکڑوں بچوں کی زندگیوں میں مثبت تبدیلی آئی ہے۔تنظیم کی کامیابیوں پر روشنی ڈالتے ہوئے مرادعلی شاہ نے لانڈھی میں ایس او ایس ٹیکنیکل ٹریننگ انسٹی ٹیوٹ کے قیام پر تبصرہ کیاجو 12 پیشہ ورانہ شعبوں میں سالانہ 1,200 نوجوانوں کو تربیت دیتا ہے۔ انہوں نے ایس او ایس اسکولوں کی طرف سے فراہم کی جانے والی سستی، معیاری تعلیم اور اپنے یوتھ ہومز کے ذریعے بالغ نوجوان کو آزادانہ زندگی گزارنے کے لیے تیار کرنے پر تنظیم کی کاوشوں کی تعریف کی۔ وزیراعلیٰ سندھ نے عطیہ دہندگان، سرشار عملے اور پرعزم رضاکاروں کے اہم کردار کا اعتراف کیا اور مشن کو برقرار رکھنے میں ان کی مسلسل حمایت اور انتھک کوششوں کے لیے شکریہ ادا کیا۔ انہوں نے بچوں کے حقوق کے حوالے سے ایس او ایس کی انتھک محنت و توجہ ، بچوں اور ان کی ایس او ایس ماؤں کی پرورش اور بااختیار ماحول فراہم کرنے کےلیے ادارے کے عزم تعریف کی۔ایس او ایس کے ساتھ حکومت کی دیرینہ شراکت داری کو اجاگر کرتے ہوئے وزیراعلیٰ سندھ نے کراچی، خیرپور اور جامشورو میں تعلیمی انفراسٹرکچر کے لیے مالی معاونت کے ساتھ ساتھ زمین کی الاٹمنٹ پر روشنی ڈالی۔ انہوں نے پریم نگر، اسلام کوٹ، تھرپارکر میں ایک نئے ایس او ایس ولیج کے فیز-1 کے لیے 437 ملین روپے کے گرانٹ کی منظوری دی۔ اس پروجیکٹ کے لیے وانکوانی فیملی نے سماجی بہبود کے اقدام کے تحت دل کھول کر عطیہ فراہم کیا۔ انہوں نے کہا کہ یہ تھرپارکر کا پہلا ایس او ایس ولیج ہوگا جو یہاں کے پسماندہ بچوں کے لیے امید کی کرن ثابت ہوگا۔یہ پسماندہ بچوں کی دیکھ بھال، تعلیم اور روشن اور باوقار مستقبل کے لیے مواقع فراہم کرے گا۔مرادعلی شاہ نے خطے کے تکمیلی اقدامات کا بھی تذکرہ کیا جن میں جدید این ای ڈی یونیورسٹی کیمپس کی ترقی اور صحت کی دیکھ بھال، بجلی، شمسی توانائی، پانی کی فراہمی اور زراعت کے منصوبے شامل ہیں جو تھرپارکر کی ترقی کے وسیع تر حکومتی وژن کا حصہ ہیں۔وزیراعلیٰ سندھ نے ایس او ایس مشن میں شامل تمام افراد اور تنظیموں کا دل کی گہرائیوں سے احترام کا اظہار کیا۔ انہوں نے کہا کہ آپ کی کوششیں صرف زندگیوں کو تبدیل نہیں کر رہیں بلکہ ایک زیادہ ہمدردانہ، منصفانہ، اور امید پر مبنی معاشرے کی تعمیر کر رہی ہیں۔ مراد علی شاہ نے کہا کہ کیا ایسا نہیں ہوسکتا کہ ہم مل کر کام کرتے رہیں اور ہراس بچے کو وہ پیار، موقع اور وقار دیا جائے جس کا وہ حقدار ہے۔
اس موقع پر خطاب کرتے ہوئے ایس او ایس چلڈرن ولیجز انٹرنیشنل کے صدر ڈاکٹر ڈیریجے ورڈوفا نے تقریب کے انعقاد اور ایس او ایس چلڈرن ولیجز کی مسلسل حمایت پر وزیراعلیٰ سندھ کا شکریہ ادا کیا۔132 سے زائد ممالک میں تنظیم کی موجودگی کو اجاگر کرتے ہوئے ڈاکٹر ورڈوفا نے کہا کہ ایس او ایس نہ صرف ضرورت مند بچوں کو پناہ فراہم کرتا ہے بلکہ ان کی تعلیم اور ہمہ گیر ترقی کو بھی یقینی بناتا ہے۔ انہوں نے ایس او ایس کی حمایت کرنے والے تمام اداروں اور افراد کا شکریہ ادا کیا اور اس عظیم مشن کو جاری رکھنے کے لیے ان کے تعاون کو اہم قرار دیا۔ انہوں نے صوبہ بھر میں ایس او ایس ویلیجز کے قیام میں سندھ حکومت کی کاوشوں کو خاص طور پر سراہا، اسے مثالی کام قرار دیا اور وزیراعلیٰ سندھ کو ان کی قیادت پر مبارکباد دی۔ اس تقریب میں پریم نگر( تھرپارکر) میں ایس او ایس ولیج کی ڈیجیٹل نقاب کشائی بھی کی گئی۔اس موقع ڈاکٹر جاوید جبار اور مسز نورین حمید نے بھی تقریب سے خطاب کیا۔
قبل ازیں وزیراعلیٰ سندھ سید مراد علی شاہ کی جانب سے چیف سیکرٹری آصف حیدر شاہ نے ڈاکٹر ڈیریجے ورڈوفا سے ملاقات کی۔ چیف سیکرٹری نے وزیر اعلیٰ سندھ کا خصوصی پیغام پہنچایا جس میں ڈاکٹر ورڈوفا کی شاندار خدمات کو سراہا اور ذاتی طور پر شرکت نہ کرنے پر افسوس کا اظہار کیا۔ اپنے پیغام میں وزیراعلیٰ سندھ نے ایس او ایس کے صدر کو سندھ میں ایس او ایس چلڈرن ولیجز کے منصوبوں کی مزید توسیع پر بات چیت کے لیے مستقبل میں ہونے والی میٹنگ کی یقین دہانی کرائی۔ انہوں نے یہ بھی بتایا کہ چیف سیکرٹری سندھ حکومت کی جانب سے وفد کی میزبانی کر رہے ہیں۔ صوبائی وزیر سعید غنی نے وزیر اعلیٰ کی جانب سے ڈاکٹر ڈیریجے ورڈوفا کو سندھ کے ثقافتی سوغات اجرک اور سندھی ٹوپی پیش کی گئی۔
