وزیر اعلیٰ علی امین خان گنڈاپور کا یتیم بچوں کے لیے روشن مستقبل کارڈ اور بیواؤں کے لیے سہارا کارڈ کے اجراء کے لیے تقریب سے خطاب کرتے ہوئے کہا ہے کہ موجودہ صوبائی حکومت بانی چیئرمین کے فلاحی ریاست کے وژن پر عمل پیرا ہے، ان پروگراموں کے اجراء پر محکمہ سماجی بہبود کی ٹیم کو خراج تحسین پیش کرتا ہوں، انصاف، میرٹ اور مساوات ریاست مدینہ کی بنیادی خصوصیات ہیں، معاشرے کے کمزور طبقوں کی سرپرستی کسی بھی ریاست کی اولین ذمہ داری ہے، ہم صوبے میں ریاست مدینہ کے ماڈل کے قیام کے لئے پر عزم ہیں، ہم لوگوں کو ریاست کا وہ چہرہ دکھائیں گے جو ایک ریاست کا ہونا چاہیے۔صوبے میں مزید کمزور اور نادار لوگوں کا ڈیٹا اکٹھا کیا جا رہا ہے، یہ شروعات ہیں، کمزور اور نادار طبقوں کی کفالت کے پروگراموں کا دائرہ مزید وسیع کیا جائے گا، اپنی روزی روٹی کمانے والے معذور افراد اور معذور طلبہ کو الیکٹرک وہیل چیئرز فراہم کر رہے ہیں۔ صحت کارڈ کا دائرہ وسیع کرکے اس میں ایمپلانٹ اور ٹرانسپلانٹ جیسے مہنگے علاج کو بھی شامل کیا گیا ہے۔ اب خیبر پختونخوا میں بون میرو، کڈنی اور لیور ٹرانسپلانٹ بالکل مفت ہے، جہیز فنڈ کو 20 ہزار سے بڑھا کر دو لاکھ روپے کیا گیا ہے، جہیز فنڈز سے اس سال چار ہزار بچیوں کی شادیاں کرائی گئیں، ہم عوام کا پیسہ عوام پر خرچ کریں گے، ہم امانت دار بن کر یہ ذمہ داری پوری کریں گے، ہم نے کوئی نیا ٹیکس لگائے بغیر اربوں روپے کی اضافی آمدن پیدا کی ہے، یہ رقم نظام میں موجود تھی جو پہلے سسٹم میں غائب ہو رہی تھی، ایک خوددار اور خودمختار قوم بننے کے لئے ہمیں اپنے وسائل کو بڑھانا ہوگا۔قرضدار قوم نہ خود مختار ہوسکتی ہے اور نہ خوددار، ہم نے ایک ایسی قوم بننا ہے جس کا خواب ہمارے اسلاف نے دیکھا تھا اور جس کے لئے ہمارے آباؤ اجداد نے قربانیاں دی تھیں۔
