وزیر اعلٰی خیبر پختونخوا علی امین گنڈاپور کی زیر صدارت اگلے سالانہ ترقیاتی پروگرام کی تیاری سے متعلق مشاورتی اجلاس منعقد ہوا ۔ اجلاس میں نئے سالانہ ترقیاتی پروگرام میں شامل کرنے کے لئے مردان ڈویژن کے مجوزہ منصوبوں پر مشاورت کی گئی۔ مردان ڈویژن سے تعلق رکھنے والے ممبران قومی و صوبائی اسمبلی اور متعلقہ حکام نے شرکت کی۔ اجلاس میں مردان ڈویژن کے جاری ترقیاتی منصوبوں پر پیشرفت کا بھی محکمانہ وار جائزہ لیا گیا ۔
صوبائی حکومت کا نیا سالانہ ترقیاتی پروگرام ایک وژنری پروگرام ہوگا، یہ اگلے چار سالوں کے سالانہ ترقیاتی پروگرام کے لئے ٹھوس بنیاد اور روڈ میپ بنیاد فراہم کرے گا، اگلے سالانہ ترقیاتی پروگرام کو منتخب عوامی نمائندوں کے تجاویز کی روشنی میں ترتیب دیا جائے گا۔علی امین گنڈاپور نے مزید کہا کہ حلقوں کی عوامی ضروریات کو سامنے رکھتے ہوئے سالانہ ترقیاتی پروگرام میں نئے منصوبے شامل کئے جائیں گے، سالانہ ترقیاتی پروگرام میں وسیع عوامی مفاد کے ٹھوس اور قابل عمل منصوبے شامل کئے جائیں گے، اگلے مالی سال کے ترقیاتی فنڈز کا بیشتر حصہ جاری ترقیاتی منصوبوں کی تکمیل کے لئے مختص کیا جائے گا، 80 فیصد یا اسے زیادہ پراگریس والے جاری منصوبوں کو اگلے سال مکمل کیا جائے گا، اس اقدام سے اگلے سال کم و بیش 50 فیصد جاری ترقیاتی منصوبے مکمل ہو جائیں گے۔صوبے کے تمام علاقوں کی یکساں ترقی میری ترجیح اور ذمہ داری ہے، بحیثیت وزیراعلی صوبے کا ہر حلقہ میرا حلقہ ہے، تمام حلقوں کو آبادی، علاقے کی پسماندگی اور عوامی ضروریات کی بنیاد پر ترقیاتی منصوبوں میں حصہ دیا جائے گا، ترقیاتی منصوبوں کے حوالے سے کسی بھی علاقے کے ساتھ کوئی ناانصافی نہیں ہوگی۔
