سینٹری ورکرز کی قیمتی جانوں کے تحفظ اور شہریوں کو بہترین بلدیاتی سہولیات کی فراہمی کے لئے چیف منسٹر پنجاب مریم نواز شریف کی خصوصی ہدایات کے مطابق جدید مشینری اور سامان مہیا کیا جا رہا ہے۔اس سامان میں خصوصی حفاظتی لباس، آکسیجن سلنڈر، وینٹلیشن سسٹم اور سیفٹی ہیلمٹس وغیرہ شامل ہیں۔ جرمن ترقیاتی ادارے کی مالی معاونت سے قریب ساٹھ لاکھ روپے کا یہ سامان جلد سینیٹری ورکرز کے استعمال کے لئے میسر ہو گا۔ان حفاظتی آلات کے استعمال سے نہ صرف سینیٹری ورکرز کی جانوں کا تحفظ ہو گا بلکہ وہ مختلف خطرناک جراثیم اور بیماریوں سے بھی بچ سکیں گے اور ان کی کارکردگی میں بھی اضافہ ہو گا۔ ان خیالات کا اظہار
شاہد عمران مارتھ ڈپٹی کمشنر شیخوپورہ نے پنجاب میونسپل ڈویلپمنٹ فنڈ کمپنی کے ماہرین کی طرف سے ان آلات کے استعمال پر منعقد کی گئی ٹریننگ کے شرکا سے خطاب کرتے ہوئے کیا۔اس موقع پر ا ن کا مزید کہنا تھا کہ شیخوپورہ اس پروگرام کے تحت پہلا شہر ہے جہاں یہ آلات مہیا کئے جا رہے ہیں اور ہم اس کے لئے پنجاب میونسپل ڈویلپمنٹ فنڈ کمپنی اور جرمن ترقیاتی ادارے کے شکر گزار ہیں۔
ٹریننگ ورکشاپ میں پچاس سے زائد مردو خواتین سینیٹری ورکرز کو سالڈ اور لیکوئڈ ویسٹ کے حوالے سے پیشہ ورانہ تحفظ اور صحت کے حوالے سے بھی آگاہی دی گئی۔ ماہرٹرینر رضوانہ انجم نے شرکا کو اس موضوع پر ایک خصوصی کتابچہ بھی مہیا کیا جس میں اس حوالے سے تمام تفصیلات موجود ہیں اور سینیٹری ورکرز اور سپر وائزر ان رہنما اصولوں پر عمل کرتے ہوئے اپنی پیشہ ورانہ ذمہ داریاں محفوظ اور مزید بہتر انداز میں ادا کر سکتے ہیں۔ٹریننگ ورکشاپ میں شرکا کو مختلف آلات کے استعمال کے حوالے سے عملی تربیت بھی دی گئی۔
ممتاز آرکٹیکٹ پلانر، پرویز اقبال اور جنرل منیجر پی ایم ڈی ایف سی، محمود مسعود تمنا نے اس موقع پر شرکا سے خطاب کرتے ہوئے ٹریننگ ورکشاپ کے اغراض مقاصد بیان کئے اور جی آئی زی فنڈ ڈ پروگرام کا تعارف پیش کیا۔ اس ٹریننگ کا اہتمام جرمن ترقیاتی ادارے کے تعاون سے کیا گیا جو کہ شیخوپورہ کے ساتھ ساتھ جہلم، ٹوبہ ٹیک سنگھ اور لاہور میں جاری ہے۔ تقریب میں ڈپٹی کمشنر شیخوپورہ شاہد عمران مارتھ، چیئرمین PMDFC پرویز اقبال، جنرل مینیجر آئی ڈی محمود مسعود تمنا، ایڈیشنل ڈپٹی کمشنر جنرل/ایڈمنسٹریٹر میاں جمیل، چیف آفیسر میونسپل کمیٹی شیخوپورہ ملک منشاء اور PMDFC اور میونسپل کمیٹی شیخوپورہ کے دیگر افسران نے بھی شرکت کی۔
