میئر کراچی بیرسٹر مرتضیٰ وہاب نے کہا ہے کہ وزیراعظم نے کراچی کیلئے 20 ارب روپے کا لولی پاپ دیا ہے جبکہ حقیقت یہ ہے کہ اس شہر کو کم از کم 200 ارب روپے درکار ہیں، اسلام آباد میں بیٹھ کر کراچی کے مسائل حل نہیں ہوسکتے، شہر کو مقامی سطح پر یکسوئی کے ساتھ کام کرنا ہوگا،اس سال بلدیہ عظمیٰ کراچی 28 ارب روپے ترقیاتی منصوبوں پر خرچ کرے گی جبکہ ٹاؤن سطح کے منصوبوں کے لئے بھی 10 ارب روپے مختص کئے گئے ہیں، شہر ٹھیکیداروں کا نہیں بلکہ شہریوں کا ہے، وفاقی حکومت کی جانب سے ٹھیکیداروں کے مفاد کو ترجیح دینا افسوسناک ہے، جو 9سال تک سڑکیں نہیں بنا سکیں وہ آج عوام کے سامنے کس منہ سے آتی ہیں،
ان خیالات کا اظہار انہوں نے نیو رضویہ سوسائٹی میں امام مہدی پارک اور اسپورٹس گراونڈ کا افتتاح کرنے کے بعد میڈیا کے نمائندوں سے گفتگو کرتے ہوئے کیا، اس موقع پر سٹی کونسل میں ڈپٹی پارلیمانی لیڈر دل محمد، منتخب نمائندے سمیت عوام کی بڑی تعداد موجود تھی، میئر کراچی بیرسٹر مرتضیٰ وہاب نے کہا کہ یہ پارک ڈیڑھ سو ملین روپے کی لاگت سے تعمیر کیا گیا ہے، یہ ساڑھے پانچ ایکڑ کی زمین پہلے کچرے کا ڈھیر تھی، تاہم اب اسے جدید تفریحی سہولیات سے آراستہ کردیا گیا ہے، پارک میں واکنگ ٹریک، فٹبال اور کرکٹ گراؤنڈ، فلڈ لائٹس سمیت دیگر سہولیات موجود ہیں، انہوں نے کہا کہ جہاں کچرا تھا وہاں آج سبزہ ہے، دینی اور سماجی اعتبار سے ہریالی صدقہ جاریہ ہے اور یہ منصوبہ کراچی کے شہریوں کے لئے بہترین تفریحی سہولت ہے۔ نیت نیک ہو تو اللہ تعالیٰ بھی مدد کرتا ہے۔ ہم نے وعدے پورے کئے اور مزید کریں گے تاکہ کراچی کو ترقی اور خوشحالی کا گہوارہ بنایا جاسکے، میئر کراچی نے کہا کہ پاکستان پیپلزپارٹی کے چیئرمین بلاول بھٹو زرداری کے وژن کے مطابق شہر میں بڑے پیمانے پر ترقیاتی منصوبے جاری ہیں، یونیورسٹی روڈ پر بی آر ٹی منصوبے پر تیزی سے کام ہورہا ہے جبکہ شہریوں کو درپیش پانی اور سیوریج کے مسائل کے حل کے لئے ٹھوس اقدامات کئے جارہے ہیں، انہوں نے کہا کہ بارشوں کے بعد نکاسی آب کو یقینی بنایا گیا ہے اور انفراسٹرکچر کی بحالی کے لئے بھرپور کام ہورہا ہے، یہ سال ترقی اور خوشحالی کا سال ہوگا، پانی اور سیوریج کے مسائل میں نمایاں بہتری آئے گی جبکہ پلوں اور انڈرپاسز کی تکمیل بھی اسی سال ہوگی، انہوں نے کہا کہ لوگ سیاسی خیرات کے ذریعے مینڈیٹ لینے والے بھی پارلیمان میں بیٹھے ہیں، اگر وہ واقعی شہریوں کے لئے کام کرنا چاہتے ہیں تو ہمارے دروازے کھلے ہیں، میئر کراچی نے کہا کہ ہماری پریس کانفرنسیں الزامات پر نہیں بلکہ کام پر ہوتی ہیں، ہم نے اختیارات کا رونا روئے بغیر ڈیلیور کیا ہے، چیئرمین پاکستان پیپلزپارٹی بلاول بھٹو زرداری کے منشور اور وژن پر عملدرآمد سب کی ذمہ داری ہے، بلاول بھٹو ہمیشہ یہ پوچھتے ہیں کہ عوام کے لئے کیا کام ہوا ہے؟ اسی سوچ کے تحت ہم تمام اضلاع میں کام کر رہے ہیں جس کی وجہ سے عوام کے مسائل حل ہو رہے ہیں۔
