وزیراعلیٰ پنجاب مریم نواز شریف نے لاہوراورنج لائن میٹرو ٹرین کیلئے پہلی خاتون ڈرائیور کی تعیناتی پراظہار مسرت کیا اور اورنج لائن کی پہلی خاتون ڈرائیور ندا صالح کو مبارکباد دی ہے۔وزیراعلیٰ مریم نواز شریف نے اورنج لائن ٹرین ڈرائیور ندا صالح کے لئے نیک تمناؤں کا اظہار کیا ہے۔ وزیراعلیٰ مریم نواز شریف نے کہا کہ بیٹیاں کسی سے کم نہیں، مساوی مواقع فراہم کرتے رہیں گے۔ ندا صالح جیسی بیٹیاں ہم سب کا فخر ہیں۔ یہ امر قابل ذکر ہے کہ ندا صالح نے یو ای ٹی لاہور سے ٹرانسپورٹ انجینئرنگ کی ڈگری حاصل کی۔اورنج لائن پراجیکٹ میں بطورٹرانسپورٹیشن انجینئرنگ شمولیت اختیار کی۔ٹرین ڈرائیور کی ٹریننگ کا گزشتہ سال مئی میں آغازکیا۔انہوں نے ٹرین ڈرائیونگ کیلئے چین کے بہترین اداروں میں بھی ٹریننگ حاصل کی۔ندا صالح کی کامیابی پاکستانی معاشرے کا اعزاز ہے۔
وزیر ٹرانسپورٹ بلال اکبر خان نے ندا صالح کو اوورنج لائن میٹرو ٹرین چلانے کا اعزاز حاصل کرنے پر شاباش اور مبارکباد پیش کرتے ہوئے اپنے ایک بیان میں کہا کہ ٹرانسپورٹ کے شعبہ میں جدت کیساتھ ساتھ ہمت کے سنہرے باب کا آغاز بھی ہوگیا جبکہ وزیر اعلیٰ پنجاب مریم نواز شریف کی قیادت میں خواتین کو ہر شعبے میں آگے بڑھنے کے مواقع مل رہے ہیں کیونکہ یہ وزیر اعلیٰ کا ویژن ہی تھا کہ جس کی بدولت ہزاروں خواتین اسٹوڈنٹس نے الیکٹرک بائیکس کو اپنی ذاتی سواری اور سفر کا ذریعہ بنایا۔ ان کا مزید کہنا تھا کہ ای ٹیکسی سکیم میں بھی خواتین ڈرائیورز کیلئے کوٹہ مختص کیا گیا ہے۔ ندا صالح جیسی باہمت اور تعلیم یافتہ خواتین ملک و قوم کیلئے باعث فخر ہیں اور ٹرانسپورٹ کے شعبے میں خواتین کیلئے کتنے زبردست مواقع ہیں، اس کی ایک بہترین مثال سب کے سامنے لا چکے ہیں۔ بہت جلد سڑکوں پر خواتین ای ٹیکسی کے ذریعے بھی باعزت روزگار کماتی نظر آئیں گی۔