*ٹرام کا روٹ ہربنس پورہ سے ٹھوکر نیاز بیگ تک مقرر،مسافروں کی سہولت کے لیے ٹرام سٹاپس کے قریب سڑک کو وسیع کیا جائے گا*

پنجاب حکومت نے شہر میں جدید اور ماحول دوست ٹرانسپورٹ متعارف کرانے کے لیے الیکٹرک ٹرام سروس شروع کرنے کا فیصلہ کر لیا ہے۔اولین مرحلے میں ٹرام کا روٹ ہربنس پورہ سے ٹھوکر نیاز بیگ تک مقرر کیا گیا ہے جو کینال روڈ کے بائیں کنارے پر بنایا جائے گا تاکہ ٹریفک میں کم سے کم رکاوٹ پیش آئے۔ مسافروں کی سہولت کے لیے ٹرام سٹاپس کے قریب سڑک کو وسیع کیا جائے گا جبکہ ٹریفک کے بہاؤ کو بہتر بنانے کے لیے کینال روڈ کے انڈرپاسز کو سنگل لین میں ضم کرنے اور جیل روڈ انڈرپاس کو ایک طرف منتقل کرنے کا منصوبہ بھی زیر غور ہے۔چین سے درآمد کی گئی تین یونٹس پر مشتمل برقی ٹرام مکمل طور پر بجلی سے چلتی ہے اور صرف 10 منٹ کی چارجنگ پر 25 سے 27 کلومیٹر سفر کر سکتی ہے۔ اس میں 250 مسافروں کے بیٹھنے کی گنجائش ہوگی۔پائلٹ پراجیکٹ کے تحت ٹرام کا تجرباتی آغاز لاہور ایئرپورٹ کے قریب ہو چکا ہے جبکہ سروس کے باقاعدہ آغاز پر کرایہ مقرر کیا جائے گا، اس کے علاوہ جلو سے ہربنس پورہ تک زیرِ زمین سڑک بنانے کی تجویز بھی زیر غور ہے تاکہ شہری رابطہ مزید بہتر بنایا جا سکے۔محکمہ ٹرانسپورٹ کا کہنا ہے کہ یہ منصوبہ لاہور کے پبلک ٹرانسپورٹ نظام کو جدید خطوط پر استوار کرنے اور پائیدار شہری ٹرانسپورٹ کو فروغ دینے کی جانب ایک اہم قدم ہے۔