وزیراعلیٰ مریم نواز شریف کی پنجاب ٹیم صوبہ بھر میں دن رات عوام کی خدمت میں مصروف عمل ہے۔ فلڈ ریلیف کیمپوں میں ہزاروں سیلاب متاثرین کے لئے صبح ،دوپہر اورشام کے کھانے کا اہتمام کیاجارہا ہے۔وزیر اعلیٰ مریم نواز شریف سیلاب متاثرہ علاقوں میں قائم فلڈریلیف کیمپ میں کھانے کی فراہمی پر رپورٹ لیتی رہیں۔ صوبائی وزراء، ڈپٹی کمشنر، اسسٹنٹ کمشنر خود جاکر سیلاب متاثرین کو کھانا پیش کررہے ہیں۔ وزیراعلیٰ مریم نواز شریف کی ہدایت پر صوبہ بھر میں سیلاب متاثرین کو خشک راشن کی فراہمی کا بھی آغاز کر دیا گیا ہے۔ ریسکیو ٹیمیں بوٹس پر جاکرسیلاب متاثرہ علاقوں میں گھر گھر کھانا مہیا کرنے میں مصروف ہیں۔ سیلاب متاثرہ علاقوں میں گھر وںمیں مقیم ہزاروں خاندانوں کو کھانا بھی پہنچایا جارہا ہے۔
وزیراعلیٰ مریم نواز شریف نے ہدایت کی کہ ریسکیو ٹیم کو ہر جگہ پہنچنا چاہیے ،کوئی سیلاب سے متاثرہ فرد کھانے سے محروم نہ رہے۔ پاکپتن ، خانیوال کے فاضل شاہ اور دیگر علاقوں کے فلڈ کیمپوں میںمقیم سیلاب متاثرہ خاندانوں کے لئے عمدہ ناشتے کا اہتمام بھی کیا جارہا ہے۔ ساہیوال کے ریلیف کیمپوں میں کھانا اور متاثرہ علاقوں میں راشن کی فراہمی جاری ہے۔ بورے والااور دیگر سیلاب متاثرہ علاقوں میں مویشیوں کے لئے چارے کی فراہمی بھی جاری ہے۔ بہاولنگر کے دریائے بیلٹ کی تمام تحصیلوں کے متاثرہ علاقوں میں کھانا اور خشک راشن تقسیم کیا جارہا ہے۔ تحصیل شجاع آباد کے فلڈریلیف کیمپوں میں سیلاب متاثرہ خاندانوں کے کم سن بچوں کو دودھ فراہم کیا جارہا ہے۔ کبیروالا کے سیلاب متاثرہ علاقوں میں راشن کی فراہمی اور متاثرہ خاندانوں کو کھانا بھی مہیا کیا جارہا ہے۔ وزیراعلیٰ پنجاب مریم نواز شریف نے سیلاب کی غیرمعمولی صورتحال کے پیش نظر انتظامیہ اور تمام متعلقہ اداروں کو بدستورمتحرک رہنے کی ہدایت کی ہے۔ وزیراعلیٰ مریم نواز شریف نے ریسکیو 1122کو ریلیف آپریشن کے لئے مزید مستعد رہنے کی ہدایت کی اور سیلاب زدہ علاقوں کے ہیلتھ کیمپ میں تمام ادویات کی فراہمی یقینی بنانے کا حکم دیا۔ وزیراعلیٰ مریم نواز شریف نے بارشی پانی سے پیدا ہونے والی بیماریوں کے علاج کے لئے انتظامات اور ادویات کی فراہمی کی ہدایت کی۔ وزیراعلیٰ مریم نواز شریف نے سیلاب زدہ علاقوں کے ریلیف کیمپوں میں خواتین کے لئے سینٹری کٹ مہیا کرنے حکم دیا اور کلینک آن ویل، فیلڈ ہسپتال اور مدراینڈ چائلڈ کلینک آن ویل کی سروسز مزید تیز کرنے کی ہدایت کی۔ وزیراعلیٰ مریم نواز شریف نے سیلاب زدہ علاقوں میں قائم ریلیف میڈیکل کیمپوں میں بہتری کی ہدایت کی اور پی ڈی ایم اے کو اضلاع میں ضرورت کے مطابق ٹینٹ اور دیگر سامان فوری مہیا کرنے کا حکم دیا۔ وزیراعلیٰ مریم نواز شریف نے پی ڈی ایم اے کو متوقع حالات کے پیش نظر بھرپور بیک اپ تیاری کرنے کی ہدایت بھی کی۔ وزیراعلیٰ مریم نواز شریف نے کہا کہ پنجاب میں تاریخ کا سب سے بڑا انخلا اور ریسکیو آپریشن کیا گیا۔ پنجاب کوسپر فلڈ کا سامنا ہے، بروقت اور بہترین انتظامات سے ہزاروں انسانی جانیں محفوظ ہوگئیں۔ پنجاب میں سیلاب سے پیشتر بروقت انخلا سے ڈھائی لاکھ لوگ محفوظ رہیں۔ وزیراعلیٰ مریم نواز شریف نے کہا کہ سیلابی ریلوں میں گھرے 9 لاکھ سے زائد متاثرین کو بروقت ریسکیو کر لیا گیا۔ انتظامیہ اور تمام اداروں کی منظم کاوشوں سے تباہی سے محفوظ رہے۔ سیلاب متاثرین ہمارے مہمان ہیں، کھانے پینے اور دیگر انتظامات میں کوئی کوتاہی برادشت نہیں کی جائے گی۔ وزیراعلیٰ مریم نواز شریف نے کہا کہ پنجاب سیلاب کی حساس ترین صورتحال سے گزررہا ہے لیکن حکومتی ادارے مستعد ہیں۔ کمشنر، ڈپٹی کمشنر، اسسٹنٹ کمشنر، پولیس، ریسکیو 1122، سول ڈیفنس اور دیگر تمام اداروں کو ہمہ وقت تیار رہنا ہوگا۔
