وزیر اعلیٰ بلوچستان میر سرفراز بگٹی سے چیئرمین واپڈا لیفٹیننٹ جنرل ریٹائرڈ محمد سعید نے ملاقات کی، جس میں بلوچستان میں برقی منصوبوں اور توانائی کے مسائل پر تفصیلی تبادلہ خیال کیا گیا۔ ملاقات میں گوادر سمیت بارڈر ایریاز کو قومی گرڈ اسٹیشن سے بجلی کی فراہمی، زرعی ٹیوب ویلوں کی شمسی توانائی پر منتقلی کے منصوبے اور توانائی کے دیگر اہم امور زیر بحث آئے۔ وزیر اعلیٰ بلوچستان نے کہا کہ بجلی کی کمی دور کرنے اور عوامی مشکلات کم کرنے کے لیے نئے قابل عمل منصوبوں پر عملدرآمد ناگزیر ہے۔ انہوں نے واضح کیا کہ صوبے کے دور افتادہ علاقوں میں بجلی کی فراہمی حکومت کی اولین ترجیح ہے، توانائی کے شعبے میں سرمایہ کاری اور انفراسٹرکچر کی بہتری صوبے کے ترقیاتی سفر کے لیے بنیادی حیثیت رکھتی ہے جبکہ عوام کو بلا تعطل بجلی فراہم کرنے کے لیے ہر ممکن اقدامات کیے جا رہے ہیں۔
وزیر اعلیٰ بلوچستان میر سرفراز بگٹی سے چیئرمین واپڈا کی ملاقات، توانائی منصوبوں پر پیش رفت کا جائزہ
