وزیر اعلیٰ خیبر پختونخوا علی امین خان گنڈاپور کی زیر صدارت سالانہ ترقیاتی پروگرام سے متعلق اجلاس منعقد ہوا ۔ محکمہ منصوبہ بندی اور خزانہ کے علاوہ متعلقہ محکموں کے انتظامی سیکرٹریز اور دیگر حکام نے شرکت کی۔ سالانہ ترقیاتی پروگرام میں شامل ترجیحی منصوبوں پر فزیکل اور فنانشل پراگرس کا جائزہ لیا گیا ۔ متعلقہ حکام کی جانب سے ان منصوبوں پر پیشرفت کے بارے وزیراعلیٰ کو محکمہ وار بریفنگ دی گئی۔وزیر اعلٰی علی امین گنڈاپور نے حکام کو رواں مالی سال کے آخر تک مکمل کرنے کے لئے ترجیحی منصوبوں کی نشاندھی کرنے کی ہدایت کی۔علی امین گنڈاپور نے کہا کہ رواں سال کے آخر تک زیادہ سے زیادہ ترقیاتی منصوبوں کو مکمل کرنا صوبائی حکومت کی ترجیح ہے، متعلقہ انتظامی سیکرٹریز اپنے اپنے محکموں کے تحت ایسے ترجیحی اور فوری نوعیت کے منصوبوں کی نشاندھی کریں، ان منصوبوں کی جلد تکمیل کے لئے درکار فنڈز ترجیحی بنیادوں پر جاری کئے جائیں گے۔مقصد عوامی مفاد کے ان منصوبوں کو بروقت مکمل کرنا ہے تاکہ عوام جلد ان کے ثمرات سے مستفید ہوسکیں، درکار فنڈز کا اجراء بروقت نہ ہونے کی وجہ سے ترقیاتی منصوبوں کی تکمیل میں تاخیر ہوتی ہے. ترقیاتی اسکیموں کی تکمیل میں تاخیر سے عوام کا پیسہ ضائع ہورہا ہے، اس لئے ترقیاتی منصوبوں کی بروقت تکمیل نہایت ضروری ہے۔ترقیاتی منصوبوں کی تکمیل کے لئے درکار فنڈز ترجیحی بنیادوں پر فراہم کئے جائیں گے، متعلقہ محکمے ان منصوبوں پر کام کی رفتار کو تیز کریں، ترقیاتی منصوبوں میں کام کے معیار پر کوئی سمجھوتہ نہیں ہوگا، انتظامی سیکرٹریز کام کے معیار پر سمجھوتہ کئے بغیر ترقیاتی منصوبوں کی بروقت تکمیل یقینی بنائیں۔
