پاکستان پیپلز پارٹی کے لیاری ٹاون میں بلدیاتی نمائندوں میں کشیدگی عدم اعتماد تک پہنچ گئی ۔22 رکنی ایوان میں سے 14 ممبران نے ٹاﺅن میونسپل کارپوریشن لیاری کے چیئرمین ناصر کریم پر کرپشن کے سنگین الزامات عائد کرکے ان کے خلاف تحریک عدم اعتماد جمع کردی ہے۔ درخواست میں دعویٰ کیا گیا ہے کہ تحریک کی کامیابی کے لئے ارکان کی سادہ اکثریت درکار ہے۔ وائس چیئرمین محمد اقبال ہنگورو نے عدم اعتماد کی تجویز پیش کی ہے، جبکہ 13 ممبران نے تائید کی ہے۔ ٹائون اور ٓوائس چیئرمین دونوں کا تعلق پاکستان پیپلزپارٹی سے ہے۔عدم اعتماد میں کی درخواست میں کہا گیا ہے کہ گزشتہ 2سال کے دوران کوئی بھی ترقیاتی کام عملی طور پر نہیں کیا گیا ، فنڈ زمیں خرد برد کی گئی ہے، سندھ سولڈ ویسٹ سے آئے 160ملازمین کو نجی کمپنی کو دیہاڑی پر دیکر ماہانہ 34 سے 35لاکھ روپے کی کرپشن کی جارہی ہے جبکہ یہ ملازمین ٹاون میں صفائی کے کام کے لیے رکھے گئے تھے۔ اسی طرح دو سال میں کروڑوں روپے کی خرد برد کی گئی ہے۔
