ڈپٹی کمشنر لاہور سید موسیٰ رضا کی قیادت میں ضلعی انتظامیہ لاہور نے اسموگ کے خلاف جامع ایکشن پلان تیار کر لیا،43 اینٹی اسموگ اسکواڈز تشکیل

ڈپٹی کمشنر لاہور سید موسیٰ رضا کی سربراہی میں ضلعی انتظامیہ نے اسموگ کے سنگین مسئلے سے نمٹنے کے لیے جامع اور موثر اقدامات اٹھائے ہیں، جو پنجاب حکومت کی ہدایات پر مبنی ہیں اور شہر کو آلودگی سے پاک بنانے کی جانب ایک بڑا قدم ہیں۔ وزیراعلیٰ پنجاب مریم نواز شریف کی ہدایت پر تیار کیے گئے اسموگ ایکشن پلان کے تحت، ڈپٹی کمشنر لاہور سید موسیٰ رضا اور چیف ٹریفک پولیس آفیسر اطہر وحید کی زیر صدارت ایک اہم اجلاس منعقد ہوا، جس میں ایڈیشنل ڈپٹی کمشنر فنانس، چیف آفیسر ایم سی ایل، محکمہ ماحولیات کے نمائندے، تمام اسسٹنٹ کمشنرز اور الائیڈ محکموں کے افسران شریک ہوئے۔ اجلاس میں اسموگ کنٹرول پلان پر عمل درآمد کے لیے مربوط اور مرحلہ وار لائحہ عمل تیار کیا گیا، اور تمام متعلقہ محکموں کو فوری اقدامات کی ہدایات جاری کی گئیں۔ اس پلان کے تحت، اسموگ کے خاتمے کے لیے 43 اینٹی اسموگ اسکواڈز تشکیل دیے گئے ہیں جو 24 گھنٹے متحرک رہیں گے اور شہر بھر میں نگرانی کریں گے۔ ضلعی انتظامیہ کی ٹیمیں اسموگ کنٹرول اقدامات کی مسلسل نگرانی کریں گی، جبکہ سی ٹی او آفس اور ڈی سی آفس میں ڈیجیٹل مانیٹرنگ ڈیش بورڈ قائم کیا گیا ہے تاکہ کارروائیوں کی براہ راست نگرانی کی جا سکے۔ ماحولیاتی آلودگی پھیلانے والی صنعتی یونٹس کے خلاف سخت کریک ڈاؤن کا فیصلہ کیا گیا ہے، اور تعمیراتی سائٹس پر اسموگ ایس او پیز پر سختی سے عمل درآمد یقینی بنایا جائے گا۔ ٹریفک پولیس کی جانب سے شہر میں دھواں چھوڑنے والی گاڑیوں کے خلاف خصوصی مہم چلائی جائے گی، اور ایل ڈبلیو ایم سی کو کوڑا کرکٹ اور ٹھوس فضلہ فوری طور پر ٹھکانے لگانے کی ہدایت دی گئی ہے۔ کوڑے کو آگ لگانے اور صفائی کے دوران گرد اڑانے پر مکمل پابندی عائد کی جائے گی، جبکہ فصلوں کی باقیات جلانے پر بھی سخت قانونی کارروائی کی جائے گی۔ تمام محکموں کو اسموگ کنٹرول پلان پر سو فیصد عمل درآمد یقینی بنانے کی تاکید کی گئی ہے، اور دھول مٹی کو کنٹرول کرنے کے لیے ڈسٹ سپریشن سسٹم فوری طور پر فعال کیا جائے گا۔ شہر میں ہیوی ٹریفک کے داخلے کے اوقات کار پر سختی سے عمل درآمد کرایا جائے گا، اور اسموگ کو ایک سنگین مسئلے کے طور پر دیکھتے ہوئے کوئی کوتاہی برداشت نہیں کی جائے گی۔ ڈپٹی کمشنر سید موسیٰ رضا نے کہا ہے کہ اسموگ کنٹرول کے لیے تمام وسائل بروئے کار لائے جا رہے ہیں، اور قانون کی خلاف ورزی کرنے والوں سے آہنی ہاتھوں سے نمٹا جائے گا۔ سکولوں کی انتظامیہ کو اسموگ کے حوالے سے آگہی پھیلانے میں تندہی سے کردار ادا کرنے کی ہدایت دی گئی ہے، جبکہ عوامی صحت کے تحفظ پر کوئی سمجھوتہ نہیں کیا جائے گا۔ محکموں کی کارکردگی کو ڈیجیٹل ڈیش بورڈ سے براہ راست مانیٹر کیا جائے گا، اور لاہور کو اسموگ فری شہر بنانا مشترکہ ہدف ہے۔