ڈپٹی کمشنر لاہور کیپٹن (ر) محمد علی اعجاز کی قیادت میں ضلعی انتظامیہ لاہور شہر میں اشیائے ضروریہ کی قیمتوں کو کنٹرول کرنے اور سپلائی چین کو مستحکم رکھنے کے لیے پوری طرح متحرک ہے۔ ڈی سی لاہور کی خصوصی ہدایت پر شہر بھر کی سبزی و فروٹ منڈیوں میں اشیاء کی رسد اور قیمتوں کی کڑی نگرانی کی جا رہی ہے تاکہ عوام کو ریلیف فراہم کیا جا سکے۔ اسی سلسلے میں لاہور کی مختلف منڈیوں میں آلو، پیاز اور ٹماٹر کے 172 ٹرکوں کی آمد سے سپلائی کی صورتحال مزید مستحکم ہو گئی ہے، جس کا مقصد مارکیٹ میں اشیاء کی وافر دستیابی کو یقینی بنانا اور قیمتوں میں استحکام لانا ہے۔ اسسٹنٹ کمشنرز اور پرائس کنٹرول مجسٹریٹس شہر کے مختلف علاقوں میں گراں فروشوں کے خلاف برسرِ پیکار ہیں اور سرکاری نرخ نامے پر عملدرآمد کو ہر صورت یقینی بنا رہے ہیں۔ ڈی سی لاہور کیپٹن (ر) محمد علی اعجاز نے واضح کیا ہے کہ شہریوں کے حقوق کا تحفظ ضلعی انتظامیہ لاہور کی اولین ترجیح ہے اور مصنوعی مہنگائی یا ذخیرہ اندوزی کرنے والے عناصر کے خلاف زیرو ٹالرنس پالیسی کے تحت سخت قانونی کارروائی عمل میں لائی جا رہی ہے۔ انہوں نے تمام متعلقہ افسران کو ہدایت کی ہے کہ مارکیٹ میں طلب اور رسد کے توازن کو برقرار رکھنے کے لیے تمام ممکنہ اقدامات بروئے کار لائے جائیں اور گراں فروشی میں ملوث افراد کے خلاف آہنی ہاتھوں سے نمٹا جائے۔ ضلعی انتظامیہ لاہور کی ان انتھک کوششوں کا مقصد لاہور کے شہریوں کو سستی اور معیاری اشیاء کی فراہمی کو یقینی بنا کر انہیں ریلیف فراہم کرنا ہے۔
گرانفروشی اور ذخیرہ اندوزی کی روک تھام کے لیے ضلعی انتظامیہ لاہور کی بھرپور کارروائیاں
