پشاور(بلدیات ٹائمز) وزیر اعلیٰ خیبرپختونخوا کے بلدیاتی اداروں کے ملازمین اور پنشنرز کو تنخواہوں اور پنشن کی یکم تاریخ کو بروقت ادائیگی کے اعلان کو عملی جامہ پہنانے کے لئے پہلا عملی قدم اٹھا لیا گیا اور خیبرپختونخوا صوبہ کے بلدیاتی اداروں کے ملازمین اور پنشنرز کے پرسنل نمبرز طلب کر لئے گئے ہیں۔ تفصیلات کے مطابق لوکل کونسل بورڈ کی طرف سے صوبہ بھر کی تمام TMAs سے ملازمین اور پنشنرز کے علیحدہ علیحدہ پرسنل نمبرز 30 ستمبر 2025 تک طلب کر لئے گئے ہیں۔ لوکل گورنمنٹ ایمپلائز فیڈریشن رجسٹرڈ خیبرپختونخوا کی شب و روز محنت کے ثمرات سامنے آنے شروع ہو گئے ہیں جس کے نتیجے میں بلدیاتی اداروں کے ملازمین اور پنشنرز کی تنخواہوں اور پنشن کی آن لائن یکم تاریخ کو بروقت ادائیگی یقینی بنانے کے لئے لوکل کونسل بورڈ نے ابتدائی طور پر صوبہ بھر کی تحصیل میونسپل ایڈمنسٹریٹر سے تمام ملازمین اور پنشنرز کے پرسنل/ونڈر نمبر ڈسٹرکٹ اکاونٹ افیسر سے مرتب کردہ طلب کرلئے ہیں جس کے لئے باقاعدہ سرکلر LCB سے جاری کر دیا گیا ہےاور مطلوبہ انفارمیشن پرفارموں پر 30 ستمبر 2025 سے قبل فراہمی لازمی قرار دی گئ ہے اور بلدیاتی اداروں کے TMOs ، TOFs اور اکاؤنٹنٹس کو پابند کیا گیا ہے ۔لوکل گورنمنٹ ایمپلائز فیڈریشن رجسٹرڈ خیبرپختونخوا کے سرپرست اعلیٰ شوکت کیانی، صدر حاجی انور کمال مروت ، چیئرمین محبوب اللہ اور جنرل سیکریٹری سلیمان خان ہوتی نے صوبہ بھر کے بلدیاتی اداروں کے متعلقین اور یونین عہدیداران سے کہا ہے کہ مطلوبہ دستاویزات ڈسٹرکٹ اکاونٹ آفس سے مرتب اور تصدیق کرا کر تاریخ مقررہ تک صوبائی لوکل کونسل بورڈ تک پہنچائیں تاکہ بلدیاتی ملازمین اور پنشنرز کو وزیر اعلیٰ کے اعلان کے مطابق یکم تاریخ کو دیگر سرکاری ملازمین اور پنشنرز کی طرح تنخواہوں اور پنشن کی ادائیگی یقینی بنانے کے لئے مزید پیش رفت ہو سکے۔
