وزیر بلدیات نے پسرور منڈی بائپاس روڈ کا دورہ کیا جہاں انتظامی افسران نے جاری منصوبوں پر بریفنگ دی۔ اس موقع پر وزیر بلدیات نے پسرور روڈ پر دلکش ڈیزائن کی ٹف ٹائل کے کام کی رفتار مزید تیز کرنے اور گرین بیلٹ کے کام کو فوری شروع کرتے ہوئے معیار ہر صورت یقینی بنانے کی ہدایت جاری کی۔وزیر بلدیات نے گفتگو کرتے ہوئے کہا کہ پسرور روڈ پر اسفالٹ کا کام جلد شروع کردیا جائے گا جبکہ آر سی سی کا کام پہلے ہی مکمل ہوچکا ہے۔ انہوں نے کہا کہ پسرور منڈی بائپاس روڈ عوام کا دیرینہ مطالبہ تھا جسے آج عملی شکل دی جارہی ہے۔ ان کا کہنا تھا کہ اس منصوبے میں انکروچمنٹ کا خاتمہ، سیوریج، ڈرینز اور بجلی کے پول سڑک سے منتقل کرنے جیسے بڑے چیلنجز شامل تھے، تاہم اب بیشتر کام مکمل ہونے کے بعد روڈ کی تعمیر تیزی سے جاری ہے۔ روڈ کی تکمیل سے ڈسکہ اور ملحقہ علاقوں کے لاکھوں شہری مستفید ہوں گے۔وزیر بلدیات نے صوبی والے گلے پر جاری خوبصورت ٹف ٹائل منصوبے کا جائزہ لیتے ہوئے ریمپ ہٹانے اور بلا تفریق یکساں گلے کی تعمیر نو یقینی بنانے کی ہدایت کی۔ بعدازاں کالج چوک اور سمبڑیال روڈ پر جاری انڈرگراؤنڈ واٹر اسٹوریج ٹینکس کے منصوبوں کا معائنہ کرتے ہوئے مون سون سے قبل کام مکمل کرنے کی ہدایت جاری کی۔وزیر بلدیات نے واضح کیا کہ ترقیاتی کاموں کے معیار اور رفتار پر کسی قسم کا سمجھوتہ نہیں کیا جائے گا۔ بعدازاں مندرانوالہ میں جاری سیور لائن منصوبے کا بھی بغور جائزہ لیا گیا جہاں شہریوں کی سہولت، احتیاطی تدابیر اور ٹریفک کی روانی برقرار رکھنے کے احکامات دیے گئے۔وزیر بلدیات نے کہا کہ ڈسکہ میں جاری تاریخی ترقیاتی منصوبوں کی ماضی میں مثال نہیں ملتی۔ ان منصوبوں کی تکمیل سے شہر کی خوبصورتی میں بے پناہ اضافہ ہوگا اور شہریوں کو صاف ستھرا اور بہتر ماحول میسر آئے گا۔ انہوں نے کہا کہ وزیراعلی مریم نوازشریف کی قیادت میں پنجاب بھر میں ریکارڈ ترقیاتی کام جاری ہیں۔
وزیر بلدیات پنجاب ذیشان رفیق کا ڈسکہ آمد پر شہر میں جاری مختلف ترقیاتی منصوبوں کا تفصیلی دورہ
