ڈپٹی کمشنر کوئٹہ مہراللہ بادینی کی زیر صدارت ایک اہم اجلاس منعقد ہوا، جس میں پرائس کنٹرول، افغان مہاجرین کی غیر قانونی دکانوں کے خلاف کارروائی اور ممنوعہ پلاسٹک بیگز کے استعمال پر پابندی سے متعلق امور پر تفصیلی غور کیا گیا۔اجلاس میں تمام متعلقہ اسسٹنٹ کمشنرز، مجسٹریٹس اور تحصیلداروں نے شرکت کی۔ اجلاس کے دوران فیصلہ کیا گیا کہ تمام افغان مہاجرین کی واپسی کو ہر صورت یقینی بنایا جائے گا۔اشیائے خوردونوش کی قیمتوں پر کنٹرول کے لیے مؤثر اقدامات کیے جائیں تاکہ عوام کو ریلیف فراہم کیا جا سکے۔ممنوعہ پلاسٹک تھیلوں کے خلاف مہم کو مزید تیز کیا جائے۔ڈپٹی کمشنر کوئٹہ مہراللہ بادینی نے ہدایت کی کہ تمام افسران روزانہ کی بنیاد پر کارروائیاں تیز کریں اور رپورٹ باقاعدگی سے جمع کرائیں۔ انہوں نے کہا کہ عوامی مفاد میں کسی قسم کی غفلت برداشت نہیں کی جائے گی۔مزید یہ کہ ضلعی انتظامیہ نے واضح کیا کہ شہر میں قانون کی بالادستی، ماحولیاتی بہتری اور عوامی سہولت کے لیے اقدامات جاری رہیں گے۔
