وزیر اعلیٰ خیبر پختونخوا محمد سہیل آفریدی کی زیر صدارت محکمہ ایکسائز، ٹیکسیشن اینڈ نارکوٹکس کنٹرول کا اہم اجلاس منعقد ہوا۔وزیر اعلیٰ نے اجلاس میں صوبے میں منشیات کے بڑھتے ہوئے مسئلے پر گہری تشویش کا اظہار کرتے ہوئے واضح ہدایات جاری کیں۔وزیر اعلٰی خیبرپختونخوا محمد سہیل آفریدی نے کہا کہ منشیات کے سپلائرز اور مینوفیکچررز کے خلاف فوری اور مؤثر کارروائی کی جائے۔منشیات کی لعنت جامعات تک پہنچ چکی ہے، مزید غفلت کے متحمل نہیں ہوسکتے۔ نوجوان نسل کو اس زہر سے بچانے کے لیے ٹھوس اور عملی اقدامات ناگزیر ہیں۔ منشیات کا مکمل خاتمہ وقت کی ضرورت ہے۔ منشیات کی تیاری، ترسیل اور فروخت کے خلاف کارروائی کے لیے مربوط حکمت عملی تشکیل دی جائے۔وزیر اعلیٰ نے مشترکہ ٹیم کی تشکیل کی ہدایت دی اور احکامات دیئے کہ تمام متعلقہ محکموں اور اداروں پر مشتمل مشترکہ کارروائی ٹیم تشکیل دی جائے۔ سلیپر سیلز کے خلاف کارروائی اپنی جگہ، مگر اصل ہدف بڑے سپلائرز اور ڈیلرز ہونے چاہئیں۔صوبے میں منشیات کے خلاف زیرو ٹالرنس پالیسی اپنائی جائے۔ کارروائیاں محض دکھاوے کی نہیں بلکہ نتیجہ خیز ہونی چاہئیں۔وزیر اعلیٰ نے تنبیہ کی کہ خواہ مخواہ کسی کو تنگ نہ کیا جائے، حقیقی بنیادوں پر کارروائی کی جائے، حکومت مکمل تعاون فراہم کرے گی۔ضبط شدہ منشیات کو فوری طور پر تلف کرنا لازمی قرار دیا گیا۔ یہ منشیات کسی صورت دوبارہ مارکیٹ میں نہیں آنی چاہئیں۔ایکسائز فورس کو مستحکم بنانے کے لیے 55 کروڑ روپے لاگت کے مجوزہ پلان کی منظوری دی گئی۔ پلان میں آپریشنل استحکام، آئی ٹی آلات کی خریداری، جدید تربیتی پروگرامز اور فورس کی مجموعی بہتری شامل ہے۔وزیراعلٰی نے سرکاری گاڑیوں کی واپسی کا حکم دیتے ہوئے کہا کہ غیر مجاز اور ریٹائرڈ افسران کے پاس موجود سرکاری گاڑیوں کی واپسی کے لیے پالیسی پر سختی سے عمل درآمد کیا جائے۔ پالیسی پر عمل نہ کرنے والوں کے خلاف قانونی کارروائی کا حکم بھی دیا گیا۔
