وزیر اعلٰی خیبر پختونخوا علی امین خان گنڈاپور کی زیر صدارت صوبائی اسمبلی کی فل ہاؤس کمیٹی کا پہلا اجلاس منعقدہوا۔ سپیکر اور ڈپٹی سپیکر صوبائی اسمبلی کے علاؤہ اپوزیشن لیڈر اور دیگر ممبران اسمبلی نے بھی اجلاس میں شرکت کی۔ اجلاس میں پختون قومی جرگے کے مطالبات پر پیشرفت کے لئے لائحہ عمل پر غور کیا گیا ۔ اجلاس میں پختون قومی جرگے کی طرف سے پیش کردہ مطالبات اور مسائل کے حل پر پیشرفت کے لئے سب کمیٹی تشکیل دینے کا فیصلہ کیا گیا ۔ سب کمیٹی میں اسمبلی میں موجود تمام سیاسی جماعتوں کی نمائندگی ہوگی۔ کمیٹی ایک ہفتے میں پختون قومی جرگے کی طرف سے پیش کردہ 27 نکات اور مطالبات پر پیشرفت کے لئے اتفاق رائے سے تجاویز پیش کرے گی۔ یہ تجاویز اسمبلی کی فل ہاؤس کمیٹی کے سامنے پیش کی جائیں گی۔ فل ہاؤس کمیٹی وفاقی حکومت سے جڑے مسائل ضروری کاروائی کے لئے وفاق کو بھیجے گی۔صوبائی حکومت سے متعلق مسائل ضروری کارروائی کے لئے صوبائی حکومت کو بھیجے جائیں گے۔ اسی طرح دیگر اداروں سے جڑے مسائل متعلقہ اداروں کو بھیجے جائیں گے۔ اجلاس میں پشتون تحفظ مومنٹ کو کالعدم قرار دیے جانے کے فیصلے پر نظر ثانی کے لئے معاملہ وفاقی حکومت کے ساتھ اٹھانے کا فیصلہ بھی کیا گیا ۔
