لاہور ڈویلپمنٹ پروگرام کامیابی سے آگے بڑھ رہا ہے،ڈپٹی کمشنر لاہور سید موسیٰ رضا

ڈپٹی کمشنر لاہور سید موسیٰ رضا کی سربراہی میں لاہور ڈویلپمنٹ پروگرام شہر کی پائیدار ترقی کی جانب ایک اہم سنگ میل ثابت ہو رہا ہے۔ ڈی سی موسیٰ رضا نے شیر سنگھ سمادھ اور بارہ دری کا تفصیلی دورہ کر کے ترقیاتی کاموں کا جائزہ لیا، جس کے دوران سی او ایم سی ایل، اسسٹنٹ کمشنر شالیمار محمد ثاقب ترازی، واسا اور دیگر متعلقہ حکام نے تفصیلی بریفنگ فراہم کی۔ ڈپٹی کمشنر نے اعلان کیا کہ وزیر اعلیٰ پنجاب کے ترقیاتی وژن کو عملی جامہ پہنانے کے لیے ہر ممکن کوشش کی جا رہی ہے اور تمام ترقیاتی کاموں میں شفافیت اور معیار کو ہر صورت یقینی بنایا گیا ہے۔ انتظامیہ نے واسا کو ہدایت دی ہے کہ سیوریج سسٹم سے متعلق ترقیاتی کام جلد از جلد مکمل کیے جائیں اور تعمیراتی کاموں کے دوران تمام تجاوزات فوری طور پر ختم کروائی جائیں۔ گلیوں میں نکھار لانے کے لیے تھڑے اور شیڈز کو فوری طور پر مسمار کرنے کا حکم دیا گیا ہے۔ ڈی سی موسیٰ رضا نے زور دیا کہ شہریوں کی سہولت کے لیے تمام ترقیاتی کام دیرپا اور مضبوط ہونے چاہیے تاکہ شہری ایک لمبے عرصے تک ان سے استفادہ حاصل کر سکیں۔ لاہور ڈویلپمنٹ پروگرام کے تحت یہ اقدامات شہر کی مجموعی بہتری اور جدیدیکرن کے عمل کو تیز کرنے میں کلیدی کردار ادا کر رہے ہیں۔