کراچی ( اسٹاف رپورٹر) فارمیسی کونسل پاکستان دس سال سے مستقل سیکریٹری سے محروم ہے۔ سیکریٹری کی سیٹ گزشتہ کئی سال سے میوزیکل چیئربنی ہوئی ہے ، کبھی ایک ایڈیشنل سیکریٹری کو چارج دیا جاتا ہے تو کبھی دوسرے کو چارج سپرد کردیاجاتا ہے۔ 900 سے زائد فارمیسی کالجز اور 70 ہزار طالب علموں کا مستقبل اس کھیل کی وجہ سے خطرے میں ہے۔ تفصیلات کے مطابق وزارت صحت کے ماتحت فارمیسی کونسل تجربہ گاہ بنی ہوئی ہے کونسل دس سال سے مستقل سیکریٹری سے محروم ہے، کبھی کسی ایڈیشنل سیکریٹری کو چارج دیا جاتا ہے تو کبھی دوسرے کو ذمے داری دی جاتی ہے۔ اسی طرح ڈائریکٹر جنرل کی سیٹ پر بھی ایک سال کے اندر تین افسران کو تعینات کیاجاچکا ہے۔ ذرائع کے مطابق اسلام آباد ہائی کورٹ کے حکم پر سیکریٹری کے عہدے سے ہٹائے گئے ڈریپ کے افسر ڈاکٹر اختر عباس کو دوبارہ چارج دینے کی تیاریاں مکمل کرلی گئی ہیں۔ واضح رہے اسلام آباد ہائیکورٹ نے وفاقی حکومت کو کونسل کے ڈھانچے کی قانون کے مطابق تنظیم نو کا حکم دیدیا ہے۔ ادھر وزیراعظم شہبازشریف نے بھی گزشتہ سال اگست میں کرپشن کی شکایات موصول ہونے پر پاکستان فارمیسی کونسل سے متعلق تحقیقات کا حکم دے دیا تھا ۔
