وزیر اعلٰی خیبر پختونخوا علی امین گنڈاپور کی زیر صدارت صوبائی کابینہ کا 36 واں اجلاس منعقد ہوا ۔ ڈیجیٹل گورننس کی طرف صوبائی حکومت کا اہم اقدام،صوبائی حکومت نے کابینہ اجلاسوں کو پیپر لیس بنادیا۔
یہ صوبائی کابینہ کا پہلا پیپر لیس اجلاس ہے جس میں کوئی فائل اور کاغذ استعمال نہیں کیا گیا۔ پیپر لیس سسٹم کے تحت کابینہ اجلاس کا تمام ایجنڈا ڈیش بورڈ پر کابینہ اراکین کو فراہم کیا گیا ہے۔ کابینہ اجلاس کی تمام سمریاں بھی ڈیجیٹل سسٹم کے تحت پراسس کی گئیں ہیں۔ پیپر لیس اجلاس شروع کرنے پر وزیر اعلیٰ نے کابینہ اراکین کو مبارکباد دی۔ کابینہ اجلاس کو پیپر لیس بنانے پر وزیر اعلیٰ نےمتعلقہ حکام کو خراج تحسین پیش کیا۔وزیر اعلٰی علی امین گنڈاپور نے کہا کہ اس سے نہ صرف فائلوں کا بوجھ ختم ہوگا بلکہ ڈیجیٹل گورننس کو بھی تقویت ملے گی. صوبائی حکومت عمران خان کے وژن کے مطابق صوبے کو ڈیجیٹیل خیبر پختونخوا بنانے کے لئے ایک مربوط حکمت عملی کے تحت اقدامات اُٹھارہی ہے۔
