وزیر بلدیات،ہاوسنگ و ٹاٶن پلاننگ سندھ ناصر حسین شاہ کی زیر صدارت پیپلز پارٹی کے ٹاؤن چیئرمینوں کا اہم اور پالیسی نوعیت کا اجلاس منعقد ہوا اجلاس کا آغاز سانحہ گل سینٹر میں قیمتی انسانی جانوں کے ضیاع پر گہرے دکھ، افسوس اور شہداء کے لیے دعائے مغفرت سے کیا گیا، اجلاس میں سیکریٹری بلدیات، ڈائریکٹر جنرل سندھ بلڈنگ کنٹرول اتھارٹی، پروجیکٹ ڈائریکٹر سندھ سالڈ ویسٹ مینجمنٹ بورڈ اور دیگر متعلقہ اداروں کے سربراہان نے شرکت کی، اجلاس سے خطاب کرتے ہوئے ناصر حسین شاہ نے کہا کہ حکومتِ سندھ بلدیاتی اداروں کو بااختیار بنانے کے لیے عملی اور ٹھوس اقدامات کر رہی ہے اور اختیارات کی نچلی سطح تک منتقلی صوبائی حکومت کی پالیسی کا بنیادی ستون ہے
، انہوں نے کہا کہ وزیراعلیٰ سندھ کی ہدایات پر بلدیاتی نظام میں اصلاحات، مالی خودمختاری اور ادارہ جاتی بہتری کے لیے اقدامات کیے جا رہے ہیں تاکہ عوامی مسائل کا حل مقامی سطح پر فوری ممکن بنایا جا سکے، وزیر بلدیات نے کہا کہ وہ تمام سیاسی جماعتوں سے تعلق رکھنے والے ٹاؤن چیئرمینوں سے بلا تفریق ملاقاتیں کر رہے ہیں تاکہ زمینی حقائق کو خود سن کر عوام کو حقیقی ریلیف دیا جا سکے، انہوں نے واضح کیا کہ ٹاؤن اور یوسی چیئرمینوں کی شکایات کے فوری ازالے کے لیے محکمہ بلدیات میں مؤثر مانیٹرنگ اور فالو اَپ سسٹم قائم کیا جا رہا ہے، ناصر حسین شاہ نے کہا کہ چیئرمین بلاول بھٹو زرداری کا وژن ہے کہ منتخب بلدیاتی ادارے عوامی خدمت کا مضبوط ذریعہ بنیں اور ان کی کارکردگی عام آدمی کی زندگی میں بہتری کی صورت میں نظر آئے، انہوں نے کہا کہ حکومتِ سندھ کی اولین ترجیح صفائی ستھرائی، نکاسی آب، سڑکوں کی بہتری اور شہری سہولیات کی فراہمی ہے، اجلاس میں حکومتِ سندھ کے جاری انیشی ایٹوز کے تحت نالوں کی صفائی، اندرونی دیواروں کی تعمیر، مون سون سے قبل پیشگی حفاظتی اقدامات اور اس مقصد کے لیے مشینری و اضافی عملے کی فوری تعیناتی کے احکامات جاری کیے گئے، وزیر بلدیات نے ٹاؤن اور یوسی چیئرمینوں کو ہدایت کی کہ وہ ترقیاتی منصوبوں کی خود نگرانی کریں تاکہ شفافیت، معیار اور عوامی اعتماد کو یقینی بنایا جا سکے، انہوں نے بتایا کہ وائس چیئرمین کے اختیارات میں اضافے کے لیے قانون سازی حکومتِ سندھ کے ایجنڈے کا حصہ ہے جبکہ پراپرٹی ٹیکس کے نظام کو مؤثر بنا کر ٹاؤنز کی آمدن میں اضافہ کرنے پر بھی کام جاری ہے، ناصر حسین شاہ نے اعلان کیا کہ بہترین کارکردگی دکھانے والے ٹاؤنز کو حکومتِ سندھ اور ورلڈ بینک کے تعاون سے اضافی ترقیاتی فنڈز فراہم کیے جائیں گے تاکہ شہری انفراسٹرکچر میں پائیدار بہتری لائی جا سکے، اجلاس کے اختتام پر شرکاء نے اس عزم کا اظہار کیا کہ حکومتِ سندھ کے وژن کے مطابق باہمی تعاون سے بلدیاتی نظام کو مضبوط بنا کر عوامی مسائل کے حل میں تیزی لائی جائے گی۔
