وزیر اعلیٰ سندھ سید مراد علی شاہ اور ورلڈ فوڈ پروگرام (ڈبلیو ایف پی) کی کنٹری ڈائریکٹر مس کوکو اوشیاما نے ماں اور بچے کی صحت کی دیکھ بھال اور ضلع ملیر میں گریڈ کچی سے 5 ویں تک کے 11000 پرائمری اسکول طلبہ کے لیے 578.39 ملین روپے کے پائلٹ پراجیکٹ کے آغاز کے حوالے سے بات چیت کی جس کا مقصد بچوں کی پڑھائی ، حاضری اور غذائیت کو بہتر بنانا ہے۔ ملاقات میں نشوونما اور ممتا جیسے جاری پروگرام کے فروغ اور ایک نئی اسکول فیڈنگ اسکیم کے ذریعے غذائی قلت سے نمٹنے کے لیے مشترکہ کوششوں کو بروئے کار لانے کا فیصلہ کیا گیا۔ ملاقات میں وزیراعلیٰ سندھ کے پرنسپل سیکریٹری آغا واصف، چیئرمین پی اینڈ ڈی نجم شاہ، سیکرٹری اسکول ایجوکیشن زاہد عباسی، سیکرٹری سوشل پروٹیکشن ڈپارٹمنٹ مزمل ہالیپوٹو اور سیکرٹری صحت ریحان بلوچ نے شرکت کی جبکہ ڈبلیو ایف پی کا وفد صوبائی دفتر کی سربراہ مس ہلڈے برگسامہ اور پالیسی آفیسر مس سلمیٰ یعقوب پر مشتمل تھا۔مس اوشیاما نے سندھ میں WFP کے موجودہ پروگراموں کا ایک جائزہ پیش کیا، جس میں ماں اور بچے کی غذائیت (MCN) پر خصوصی زور دیا گیا۔ انہوں نے غذائی قلت سے نمٹنے کے لیے اسٹنٹنگ، ویسٹنگ، کنڈیشنل کیش ٹرانسفرز (سی سی ٹی) اور فوڈ سپلیمنٹس کی تقسیم سمیت دیگر شعبوں سے متعلق تبادلہ خیال کیا۔وزیراعلیٰ سندھ مراد علی شاہ نے ڈبلیو ایف پی کے تعاون کو سراہتے ہوئے سندھ حکومت کے صحت پر مرکوز اقدامات کی تفصیلات بتائیں۔ ان اقدامات میں دو بڑے پروگراموں کے ذریعے حاملہ اور دودھ پلانے والی خواتین کے ساتھ غذائی قلت کا شکار بچوں کی مدد بھی شامل ہے جن میں ایک وفاقی بے نظیر انکم سپورٹ پروگرام (BISP) کے نشوونما اور دوسرا صوبائی مدر اینڈ چائلڈ سپورٹ پروگرام (ممتا) شامل ہیں۔ ملاقات میں دونوں پروگراموں سے متعلق ڈپلیکیشن خدشات کو بھی دور کیا گیا۔ یہ نتیجہ اخذ کیا گیا کہ اگرچہ کچھ اوورلیپس موجود ہیں مگر دونوں پروگراموں کے ڈیزائن بڑی حد تک تکمیلی ہیں۔ بی آئی ایس پی نشوونما قومی کفالت رجسٹری کے ذریعے مستفید ہونے والوں کے حوالے سے معلومات فراہم کرتی ہے جبکہ ممتا پروگرام سندھ کے 15 اضلاع میں خود اندراجی کی اجازت دیتا ہے۔اس بات پر اتفاق کیا گیا کہ انتہائی غریب خاندانوں میں ماں اور بچے کی صحت کو بہتر بنانے کے مشترکہ مقصد کے پیش نظر دونوں اقدامات کو جاری رکھنا چاہیے ، نشوونما بنیادی طور پر فوڈ سپلیمنٹس پر مرکوز ہے، ممتا سی سی ٹی کے ذریعے مالی مدد پر زور دیتی ہے۔ کوآرڈینیشن کو بڑھانے اور غیر ضروری اقدامات سے گریز کرنے کے لیے، تین ایکشن پوائنٹس قائم کیے گئے ہیں، بشمول دونوں پروگراموں کے تکنیکی ڈیزائن پر نظرثانی کرنا تاکہ جامع خدمات کی فراہمی کے لیے شرائط کو ہم آہنگ کیا جا سکے۔ اوورلیپ کی نشاندہی کرنے، وسائل کو بہتر بنانے اور سروس کے خلا کو پُر کرنے کے لیے دو طرفہ ڈیٹا شیئرنگ میکانزم کا قیام اور استفادہ کنندگان کی شناخت اور خدمات کی فراہمی کو ہموار کرنے کے لیے مشترکہ اندراج اور ہدف سازی کا فریم ورک تیار کرنا۔وزیر اعلیٰ سندھ اور ڈبلیو ایف پی کے وفد نے موسمیاتی تبدیلی کے اثرات بالخصوص سندھ کی غیر محفوظ آبادیوں سے نمٹنے کے لیے مستقبل میں مشترکہ تعاون پر بھی اتفاق کیا۔
اسکول کے کھانے کا پروجیکٹ: سندھ حکومت اور ڈبلیو ایف پی تعلیمی سال 26-2025 کے لیے ملیر ڈسٹرکٹ میں اسکول میلز پراجیکٹ کے ایک سال پائلٹ کو 578.39 ملین روپے کی مالی معاونت فراہم کریں گے۔ پروگرام کا مقصد 11,000 پرائمری اسکول کے طلباء (گریڈ کچھی سے 5) کو روزانہ تازہ کھانا فراہم کرنا ہے تاکہ سیکھنے، حاضری اور غذائیت کو بہتر بنایا جا سکے۔سندھ حکومت 462.71 ملین روپے (80 فیصد) جبکہ ڈبلیو ایف پی 115.68 ملین روپے (20 فیصد) فراہم کرے گی۔ یہ اقدام کلاس روم میں بھوک سے نمٹنے، توجہ اور تعلیمی کارکردگی کو بڑھانے اور لڑکیوں کو تعلیم کی جانب راغب کرنے اور صنفی امتیاز کو کم کرنے کے لیے ڈیزائن کیا گیا ہے۔کھانے کی تیاری، پیکیجنگ اور تقسیم کے لیے ایک مرکزی باورچی خانے کا نظام قائم کیا جائے گا۔ کھانے میں دال، چاول/روٹی، سبزیاں اور ہفتہ وار پھل شامل ہوں گے۔ سندھ فوڈ اتھارٹی فوڈ سیفٹی آفیسر کے ساتھ، حفظان صحت اور غذائیت کے معیار کو یقینی بنائے گی۔ ڈبلیو ایف پی تیسرے فریق کنٹریکٹر کے ذریعے عمل درآمد کی نگرانی کرے گا اور ساتھ ساتھ نگرانی، تشخیص اور رپورٹنگ کو لیڈ کرے گی۔پائلٹ خاص طور پر ملیر میں پیری اربن اسکولوں کوہدف بنائے گا جن میں بنیادی ڈھانچہ، صاف پانی اور صفائی کی سہولیات موجود ہیں۔ اسکولوں کو طالب علم کے اندراج کی کم از کم حد کو بھی پورا کرنا ہوگا۔
ایک مضبوط نگرانی کا نظام 70 فیصد روزانہ حاضری کو یقینی بنانے کے لیے اہم میٹرکس جیسے اندراج، برقرار رکھنے اور حاضری کو ٹریک کرے گا۔ ڈبلیو ایف پی پورے سندھ میں ممکنہ اسکیلنگ اپ کو مطلع کرنے کے لیے بیس لائن اور اینڈ لائن کی جانچ کرے گا۔ ایجوکیشن مینجمنٹ انفارمیشن سسٹم (EMIS) اور اسکول کے ریکارڈ کے ڈیٹا کو پیمائش کے لیے استعمال کیا جائے گا۔
وزیر اعلیٰ سندھ نے اس بات پر زور دیا کہ تعلیمی فوائد کے علاوہ اس منصوبے سے غذائیت کی کمی کو کم کرنے، خوراک کی خریداری کے لیے مقامی ملازمتوں کے دروازے کھل جائیں گے اور کمیونٹی فوڈ سسٹم مضبوط ہوگا۔ انہوں نے ٹارگٹڈ مراعات فراہم کرنے ، اسکولوں کو بہتر کرنے اور لڑکیوں کو بااختیار بنانے کے حوالے سے پروگرام کی اہمیت کو بھی اجاگر کیا۔مرادعلی شاہ نے اسکول کے کھانے کے حوالے سے پائلیٹ کو پائیدار ماڈلزقرار دیا اور اور یہ سندھ بھر میں اسکیلنگ کے لیے مستقبل میں رہنمائی فراہم کرے گا۔
