*یکم تا دس محرم لاہور میں کل 5ہزار 235مجالس کا انعقاد ہو رہا ہے۔ کمشنر لاہور مریم خان*

کمشنر لاہور مریم خان نے کہا ہے کہ یکم محرم سے لاہور میں جلوس و مجالس شروع ہیں انتظامات کو حتمی بنایا گیا ہے۔ انہوں نے کہا کہ یکم تا دس محرم لاہور میں کل 5ہزار 235مجالس کا انعقاد ہورہا ہے، یکم تا دس محرم 99بڑے جلوس اور کل 538جلوس برآمد ہورہے ہیں۔کمشنر لاہور نے کہا کہ لاہور میں 12ہزار سے زائد سکیورٹی و پولیس سٹاف محرم پر فرائض ادا کرے گا، محرم الحرام کے دوران جلوسوں اور مجالس کیلئے میونسپل سروسز فوری مہیا کی جارہی ہیں۔کمشنر لاہور مریم کی زیر صدارت محرم الحرام انتظامات کے حوالے سے اجلاس منعقد ہوا۔ اجلاس میں مرکزی جلوسوں و مجالس کے منتظمین و لائسنس ہولڈرز، ضلعی انتظامی محکموں کے افسران نے شرکت کی۔کمشنر لاہور مریم خان نے ضلعی انتظامیہ کو ہدایات دیتے ہوئے کہا کہ تمام محکمے انتظامات مکمل کریں فیلڈ میں موجود رہیں، محرم انتظامات سوفیصد یقینی بنانے پر کوئی کمپرمائز نہیں۔ انہوں نے کہا کہ ساؤنڈایکٹ، مجالس و جلوسوں کے اوقات کار و روٹ کی پابندی پر عملدرآمد یقینی بنایا جائے گا، تمام مجالس کے مقامات پر انسداد ڈینگی سپرے کو یقینی بنایا جائے۔ کمشنر لاہور نے مزید کہا کہ وزیراعلی پنجاب کا محرم انتظامات کیلئے اقدامات پر براہ راست فوکس ہے۔ڈی سی لاہور کیپٹن ریٹائرڈ علی اعجاز نے کہا کہ روٹس و مجالس کے مقامات پر ضلعی انتظامیہ کی طرف سے ہر ممکن سہولیات فراہم کی جارہی ہیں۔ پولیس، ضلعی انتظامیہ اور منتظمین محرم مجالس و جلوسوں کیلئے رابطہ میں ہے۔اجلاس میں ڈی سی لاہور کیپٹن ر علی اعجاز، ایڈیشنل کمشنر راو عبدالجبار، ایڈیشنل کمشنر محمد ارشد بھٹی، سی اوایم سی ایل شاہد کاٹھیا، ایم ڈی واسا غفران احمد سمیت پولیس، صحت، ایل ڈبلیو ایم سی، سوئی گیس، لیسکو، پارکنگ، پنجاب فوڈ اتھارٹی افسران نے شرکت کی۔