*وزیراعلیٰ پنجاب کے “سیف مون سون وژن” کے تحت لاہور میں میگا انڈر گراؤنڈ واٹر ٹینکس منصوبے تیزی سے جاری*

وزیراعلیٰ پنجاب مریم نواز شریف کے “سیف مون سون وژن” کے تحت لاہور میں اربن فلڈنگ کے مسائل پر قابو پانے اور بارشی پانی کے مؤثر انتظام کیلئے میگا انڈر گراؤنڈ واٹر اسٹوریج ٹینکس کے منصوبوں پر تیزی سے کام جاری ہے۔ اس سلسلے میں سیکرٹری ہاؤسنگ پنجاب نورالامین مینگل کی ہدایت پر مختلف مقامات پر جدید واٹر اسٹوریج ٹینکس کی تعمیر کا عمل جاری رکھا گیا ہے۔ترجمان محکمہ ہاؤسنگ کے مطابق شہر لاہور میں پانچ نئے انڈر گراؤنڈ واٹر اسٹوریج ٹینکس زیر تعمیر ہیں، جن کی تکمیل کے بعد شہر میں فنکشنل میگا واٹر اسٹوریج ٹینکس کی مجموعی تعداد 18 ہو جائے گی۔ترجمان کے مطابق اسلام پورہ بابا گراؤنڈ واٹر ٹینک کا تقریباً 90 فیصد کام مکمل کیا جا چکا ہے، جبکہ لکشمی چوک واٹر اسٹوریج ٹینک کا 65 فیصد، چوبرجی انڈر گراؤنڈ واٹر اسٹوریج ٹینک کا 50 فیصد، یو ای ٹی واٹر ٹینک کا 40 فیصد اور برکت مارکیٹ واٹر اسٹوریج ٹینک کا 35 فیصد کام مکمل کر لیا گیا ہے۔ترجمان کے مطابق زیر تعمیر ان واٹر ٹینکس کی مجموعی گنجائش 70 لاکھ گیلن ہے، جس کے ذریعے بڑے پیمانے پر بارشی پانی ذخیرہ کیا جا سکے گا اور شہر میں اربن فلڈنگ کے مسائل کے حل میں نمایاں مدد ملے گی۔ترجمان نے بتایا کہ ماضی میں اہم شاہراہوں پر کئی کئی فٹ پانی جمع ہو جاتا تھا جس کے باعث شہریوں اور راہگیروں کو شدید مشکلات کا سامنا کرنا پڑتا تھا، تاہم ان منصوبوں کی تکمیل کے بعد صورتحال میں نمایاں بہتری آئے گی۔سیکرٹری ہاؤسنگ پنجاب نورالامین مینگل کی ہدایت پر تمام منصوبوں کو مقررہ مدت میں جلد از جلد مکمل کرنے کیلئے متعلقہ اداروں کو خصوصی احکامات جاری کیے گئے ہیں تاکہ مون سون سیزن سے قبل شہریوں کو زیادہ سے زیادہ ریلیف فراہم کیا جا سکے۔ترجمان محکمہ ہاؤسنگ نے مزید کہا کہ وزیراعلیٰ پنجاب کی ہدایات کے مطابق لاہور میں متعدد انڈر گراؤنڈ واٹر ٹینکس پہلے ہی فنکشنل ہو چکے ہیں، جبکہ مزید منصوبوں پر تیزی سے کام جاری ہے۔ترجمان کے مطابق حکومت پنجاب عوام دوست پالیسیوں پر عمل پیرا ہے اور شہریوں کو بہتر، محفوظ اور جدید شہری سہولیات فراہم کرنے کیلئے تمام وسائل بروئے کار لائے جا رہے ہیں۔